“Çox maraqlıdır, hamı “böyük oyun” deyir. Böyük oyun isə yayımlanmayacaq”
Korner.az-ın məlumatına görə, bu sözləri “Neftçi” klubunun mətbuat xidmətinin rəhbəri Gündüz Abbaszadə facebook səhifəsində paylaşdığı statusda yazıb. Klub rəsmisi fevralın 9-da keçiriləcək “Xəzər Lənkəran”- “Neftçi” matçının canlı yayımlanmamasında “Xəzər Lənkəran” tərəfini günahkar bilib:
“Əminəm ki, bu məsələdə İdman Azərbaycan kanalının zərrə qədər “günahı” olsaydı, indi mətbuat susmayacaqdı. Azarkeşlərimizi “Böyük oyunsuz” qoymaq istəyən isə bu dəfə “Xəzər Lənkəran” tərəfidir. Açıq danışmaq lazımdır, əvvəlki illərdə klublar yayım üçün TV-yə xahiş minnət edirdilər. Hətta, yayım üçün tələb olunan texniki xərcləri belə klublar ödəyirdi. İndi PFL və TOPAZ yayım üçün hər şəraiti yaradıb. Pulsuz parasız. Bəs niyə mane oluruq? “Yayım üçün kluba pul ödənilməlidir” bəhanədən başqa bir şey deyil. İndi yadınıza düşdü? “Dünən”ə qədər yayım üçün pulu ödəyən siz idiniz axı?! Mustafa hocadan soruşun zəhmət olmazsa, Türkiyədə başqa oyunu demirəm, “Beşiktaş” – “Konyaspor” oyunu yayımlanmasa ictimaiyyət nə reaksiya verərdi? Təsəvvür belə etmək çətindir”.