Dünən keçirilən “Azal”- “Neftçi” oyununun nəticəsi, hakim idarəçiliyi görünür, hələ çox müzakirə olunacaq.
Korenr.az-ın məlumatına görə, “Neftçi”nin mətbuat xidmətinin rəhbəri Gündüz Abbaszadə verdiyi açıqlamada maraqlı faktlar irəli sürüb: “Dünənki oyunda hakimə etirazımız əbəs yerə deyildi və bu etirazımızı sona qədər davam etdirəcəyik. Kimlərsə bizim “Neftçi”yə göstərilən qırmızı vərəqələrə etiraz etdiyimizi düşünürsə, yanılır. Biz rəqibin qapıçısı Ruslan Məcidova cərimə meydançasından kənarda əllə oynadığı üçün göstərilməyən qırmızı vərəqəyə, eləcə də AZAL-ın müdafiəçisi Aleksandr Şemonayevin sistematik qayda pozuntularına göz yumulmasına, lehimizə olan penaltinin təyin olunmamasına etiraz edirik. Maraqlı bir faktı deyim, oyunun baş hakimi Orxan Məmmədov qəbələlidir. Hətta bu mövsümün 3-cü turunda keçirilmiş “Sumqayıt” – “Qəbələ” oyunundan sonra bəzi qəbələli azarkeşlərin onun Qəbələdə yaşayan atasının evini yandırmaq istədiyini və onun evinin qarşısında piket keçirdikləri haqda xəbərlər də yayılmışdı. Necə olur ki, “Neftçi”nin qızıl medallar uğrunda mübarizədə əsas rəqiblərdən birinin “Qəbələ” olduğu nəzərə alınmır, vaxtilə yerliləri tərəfindən təzyiqlə üzləşmiş bir hakim “Neftçi”nin oyununa təyin olunur. Kim zəmanət verə bilər ki, Orxan Məmmədov növbəti dəfə təzyiqlə üzləşəcəyindən qorxmur? Yerlilərinin maraqlarını güdmür? Məncə, bunu araşdırmağa dəyər. Hakimlərimizin qərəzli olmadığına ümid etsək də, Orxan Məmmədovun idarəçiliyindən sonra buna inanmağımız gəlmir”
qafqazinfo.az
