Bu gün FutbolPress.Az saytının fəaliyyətə başlamasının 6 ili tamam olur. Sayt 2009-ci il 1 noyabr tarixindən oxucularıyla ünsiyyətdədir.
Futbolpress.Az 2008-ci ilin 28 noyabrından dərc olunmağa başlayan “Futbol-Press” qəzetinin davamçısıdır. Qəzet fəaliyyətə qeyri-müəyyən müddətə dayandırıb, əvəzində oxucularıyla onlayn görüşə gəlir.
Ötən 6 il barədə “FutbolPress”in yaradıcısı və baş redaktoru Elçin Cəlilovun fikirləri: “6 il az müddət deyil. İdman mediasında rolumuzun nədən ibarət olduğunu hiss etməyə çalışmışıq. Biz “rəhbərindən və bir noutbukdan ibarət saytlar” kateqoriyasına aid başlanğıc edənlərdənik və bunula fəxr edirik. Cəmiyyətdə, oxucular qarşısında qazandığımız inamdan sui-istifadə edib, heç vaxt manipulyasiya etməmişik. Əməkdaşımız heç vaxt futbolçudan müsahibə alanda əvəzində nəsə ummayıb.
Mən bu işə qəzetlə başlamışdım, ancaq qəzet saxlamaq çox çətindir. ya satılmalısan, ya da müstəqil qəzet işlətmək mümkünsüzdür, heç kim inanmasın və aldanmasın.
Bizim 6 ildə qazandığımız ən böyük nemət dürüstlükdür.
Jurnalistika prinsiplərinə sadiq qalmaq qədər çətin şey yoxdur. Bizimlə əməkdaşlığa başlayanları hərtərəfli yoxlayıb, məriftinə, savadına tam əmin olandan sonra işə dəvət etmişik.
Biz bəzilərindən fərqli olaraq, özümüzü tərifləmirik və xüsusi imtiyazlı saymırıq. Kimin harda nə hoqqadan çıxdığı da məlumdur, kimin təmiz iş gördüyü də. Ən azı, klub və futbol qurumlarının idarəçiləri, rəhbərləri dəqiq bilir hansı sayt və qəzet qürurlu fəaliyyət göstərir, hansı manipulyasiya edir, oxucunun inamı üzərində rola girib, öz niyyətlərini həyata keçirir.
Davam edirik, çətinliklər olsa da, qarşıda müəyyən layihələrimiz var. “FutbolPress”in ideyaları Avropada səs salmış işlər olub. İnşallah, həmin əzəməti bərpa edib, davam edəcəyik. Sadəcə, qarışıqlıq çoxdur, məqamını gözləyirik”
Korner.az saytının kollektivi “Futbolpress”çiləri təbrik edir, gələcək işlərində onlara müvəffəqiyyətlər arzulayır.
