"Neftçi"nin Çempionlar Liqasının təsnifat mərhələsində "Skenderbeu"ya məğlub olmasını bir qrup "Xəzər Lənkəran" azarkeşinin toy-bayrama çevirməsi "ağ-qaralı" fanatların kəskin reaksiyasına səbəb olub.
"Forza Neftçi" Azad Azarkeş Qrupunun rəhbəri Sübhan Əliyev Korner.az-a açıqlamasında "flaqman"ın uğursuzluğuna sevinənlərə yaxın tarixə qayıtmağı məsləhət bilib.
"Deyəsən, "Xəzər Lənkəran" fanatları avrokuboklara necə vəsiqə qazandıqlarını unudublar. Yaddan çıxarmasınlar ki, çempionatı 9-cu yerdə bitirən komanda avrokuboklara məhz "Neftçi"nin hesabına gedir. Əllərindən tutub Avropaya aparırıq ki, üzümüzə ağ olsunlar? Niyə axı, "Neftçi"nin məğlubiyyətinə sevinirlər? Komanda udar da, uduzar da. Ötən il "Neftçi" Avropa Liqasının qrupuna düşəndə qarınları qurd basanların qurdları indi üzə çıxır yavaş-yavaş. Eybi yox. Allah canlarını sağ eləsin. Biz böyüklüyümüzü göstəririk. Avrokuboklarda bütün komandalarımıza uğurlar arzu edirik. Hər nə olsa, Azərbaycanın adıdı. İnşallah, növbəti mərhələyə vəsiqə qazanarlar", – deyə o bildirib.
Qrup rəhbəri "Neftçi"nin növbəti mövsüm yenidən adından söz etdirəcəyini əminliyini də ifadə edib: "O ki, qaldı "Neftçi"yə biz hər zaman komandamızın yanındayıq. İnşallah, gələn mövsüm əvəzini artıqlaması ilə çıxarıq".
