“Mənə pis suallar veriləndə, onların hamısını başa düşürəm. Bu, yüz faiz belədir. Artıq mimikadan bilirəm ki, bu, yaxşı sual deyil”.
Korner.az-ın məlumatına görə, bu fikirləri apasport.az-a açıqlamaısnda Azərbaycan yığmasının baş məşqçisi Berti Foqts deyib.
2008-ci ilin aprelindən millimizi çalışdıran 67 yaşlı almaniyalı mütəxəssis azərbaycanlı jurnalistlərdən heç bir narazılığının olmadığını bildirib: “Sizlər öz işinizi görürsünüz. Fərq ondadır ki, kimsə bunu yaxşı, kimsə pis görür. Ancaq azərbaycanlı jurnalistlərə münasibətim yaxşıdır. Hərəmiz öz işimizi görürük. Sadəcə, bura gələn Almaniya, Portuqaliya yığmasının baş məşqçiləri Yoahim Lövlə Pauylu Bentu və digərləri mənə deyir ki, burda jurnalistlərin verdiyi sualları başa düşmürük. Doğrudanmı sizə hər mətbuat konfransında bu sualları verirlər və siz də onlara cavab verməlisiniz. Mən bunu eşidəndə, təəssüflənirəm, hirslənirəm. Bu, məni çox incidir. Çünki bunu Azərbaycanda bütün jurnalistlərə şamil etmək olmaz. Hansısa bir jurnalist gəlib səhv sual verir və onunla fikir formalaşır. Ancaq əslində, belə deyil”.
Özünü azərbaycanlı hesab edən Foqtsun sözlərinə görə, xaricdən gələn məşqçilərin yerli jurnalistlərlə bağlı belə danışmağı ölkə üçün müsbət hal deyil: “Mən yenə onlara deyirəm ki, qeyri-peşəkar jurnalistlə rastlaşmağınız ola bilər. Ancaq mən 5 ildir burdayam, vəziyyət düşündüyünüz kimi deyil. Mən bir azərbaycanlı kimi deyirəm ki, onlardan üzr istəyirəm. Həmin jurnalistləri “Rəvan” – “Kəpəz” oyununda görmürsən, ancaq gəlib millinin, Çempionlar Liqasında “Bavariya”nın matçlarına baxırlar. Sonra Azərbaycan yığmasını “Bavariya” ilə müqayisə etmək istəyirlər. Bu haqda fikirləşmək lazımdır ki, portuqaliyalı, almaniyalı jurnalistlər burdakı sualları eşidəndə ölkə barəsində yazırlar. Biz öz ölkəmizi müsbət reklam eləməliyik. Hamı bilsin ki, bizim jurnalistlər də yaxşıdırlar”.
