İordaniyaya uduzmaqla (ilk oyun 1:1, cavab oyunu 1:1; penaltilərlə 6:5) DÇ-2014-lə vidalaşan Özbəkistan millisi baş məşqçisiz qala bilər.
Korner.az-ın məlumatına görə, “Neftçi”nin hücumçusu Bahodir Nasimovun da şərəfini qoruduğu Özbəkistan yığmasının çalışdırıcısı Mircəlal Kasumov məğlubiyyətə görə üzr istəyərək bütün məsuliyyəti öz üzərinə götürüb.
“Azarkeşlərimizdən üzr istəyirəm. Bütün futbolçularıma təşəkkür edirəm, onlara heç bir iradım yoxdu. Bütün günahı öz üzərimə götürürəm. Biz daha çox yol qət etmək istəyirdik. Bu missiyanı tamamlaya bilmədim və istefa ərizəmi federasiyaya təqdim edəcəm. Komandaya “yeni qan” lazımdı. Əminəm, komanda toparlanacaq və yenə uğur qazanacaq”.
Qeyd edək ki, İordaniya millisi DÇ-2014-ün final mərhələsinə vəsiqə uğrunda Cənubi Amerika zonasının 5-ci komandasıyla həlledici oyunda üz-üzə gələcək.
