AZAL-ın futbolçusu Ruslan Tağızadə Premyer Liqanın 15-ci turunda səfərdə “Xəzər Lənkəran”a 2:1 hesabı ilə qalib gəldikləri oyunla bağlı Korner.az-ın suallarını cavablandırıb
– "Xəzər Lənkəran"la oyunda uğursuzluğa son qoyduz. Lənkəran səfəri ilə bağlı fikirlərini bilmək istəyərdim.
Bu oyuna cidi hazırlaşmışdıq. Ancaq qələbə haqda fikirləşirdik. Lənkəran səfərinin çətin olacağını bilirdik. Çünki "Xəzər Lənkəran" iddialı klubdu və çempionluğa oynayır. Şükürlər olsun ki, baş məşqçinin verdiyi tapşırıqları dəqiq yerinə yetirib, qələbə qazandıq.
– "Xəzər Lənkəran"ın qapısına ilk qolu sən vurdun və bu sevincini komanda yoldaşlarınla maraqlı bir şəkildə qeyd etdin.
Oyundan öncə ürəyimdə qəribə bir hiss var idi ki, ya qol vuracam, ya da məhsuldar ötürmə verəcəm. Lakin elə oldu ki, qol vurdum. Qol sevincinə gəlincə isə, heç özüm də bilmədim ki, komanda yoldaşlarım nə oynayır. Sadəcə bu sevincə onlarla birgə qoşulub mən də oynadım. Mən bilən, belə rəqsləri Braziliyada oynayırlar.
– İkinci hissədə güclü duman səbəbi ilə hakim oyunu dayandırdı. Həmin anı sən necə xatırlayırsan?
Həmin anda duman elə həddə çatmışdı ki, komanda yoldaşlarımı görə bilmirdim. Hakim düzgün qərar verib oyunu yarımçıq dayandırdı.
– Və bu sizə daha çox yaradı…
Bəli. Oyunun bir gün ertələnməsi, demək olar ki, bizə daha çox yaradı və nəticədə qələbə qazandıq.
– Yarımçıq dayandırlan matçdan sonra Vaqif Sadıqov (AZAL-ın baş məşqçisi) sizə nə kimi tapşırıq verdi?
Baş məşqçimiz bizə yeni tapşırıqlar verdi və bunun nəticəsində qələbə qazandıq. Vaqif müəllim bizə demişdi ki, bu cür oynasaz qələbə qazana bilərik. Biz də baş məşqçinin tapşırıqlarını səhvsiz yerinə yetirib, qalib gəldik.
– Bu 3 xal sizi "Xəzər Lənkəran"a daha da yaxın etdi. İndi siz "Xəzər Lənkəran"dan bir xal geri qalırsız. İlk "altılıq" şanslarınızı necə dəyərləndirirsən?
Bu dəqiqə komandalar turnir cədvəlində elə düzülüb ki, kim xal itirsə, aşağı düşür. Buna görə də çalışırıq ki, hər oyunda maksimum xal qazanıb, hədəfimizə çataq.
– Növbəti turda daha bir iddialı komanda – "İnter"lə oynayacaqsız. Bu matçda hansı nəticəyə ümid edrisiz?
Biz bütün oyunlara qələbə qazanmaq üçün çıxırıq. "İnter"lə matçda da, 3 xal üçün oynayacağıq. Artıq biz Lənkərandakı oyunu unudub "İnter"lə matça da, köklənirik. Bu oyunda qələbə qazanmaq istəyirik ki, turnir cədvəlində yerimizi daha da yaxşılaşdıraq.
Səxavət QURBANOV
