"Rəvan"ın futbolçusu Amit Quluzadənin Korner.az saytına müsahibəsi
-Dünən Topaz Premyer Liqasının XIV turu çərçivəsində doğma meydanda "Qəbələ"yə məğlub oldunuz. Oyunla bağlı fikirlərini öyrənmək maraqlı olardı.
Sözün düzü oyun bizim üçün yaxşı başlamadı. Birinci hissədə istədiyimiz oyunu sərgiləyə bilmədik. Rəqib 10 nəfərlə qaldıqdan sonra düşündüm ki, bəlkə oyunun taleyinə dəyişə bilərik amma təəssüflər olsun ki, olmadı.
– Oyuna sonradan daxil oldun. Hansı komponentlərdə rəqibə yenildiniz?
Bilirsiniz, düzdür, oyuna sonradan daxil oldum, amma mən meydana girəndə 11 nəfər idik və hesab 1:2 idi. Fikirləşdim ki, nəsə etmək olar. Sonra da hakim bizim futbolçumuza qırmızı vərəqə göstərdi və penaltidən hesab 1:3 oldu. Biz çox istəyirdik ki, bu oyunda da xal qazanaq.
– Bu oyundakı hakimlərin idarəçəliyi ilə bağlı nə deyə bilrsən? Fariz Yusifovun qərarlarını qərəzli hesab edirsən?
Fariz müəllim çox təcrübəli hakimlərimizdəndir. Düşünmək istəmirəm ki, qəsdən "Rəvan"ı məğlubiyyətə aparsın. Çünki Fariz Yusifovun "Rəvan"la nə qəsd-qərəzi ola bilər ki?
-Əvvələr "Neftçi"də oynayırdın. "Rəvan"dan öncə son olaraq "Kayseri Erciyesspor" komandasında çıxış etdin. Bu klublardan hansında oynamaq sənin üçün daha rahat oldu?
Sözün açığı adını sadaladığınız bu üç klubdan "Rəvan"da oynamaq nisbətən asandı. Çünki "Neftçi" və "Kayseri Erciyespor" çox güclü kollektivlərdən təşkil olunub. O komandalarda əsas heyətə düşmək olduqca çətin idi.
-Çərşənbə axşamı Azərbaycan kubokunun 1/8 finalı çərçivəsində I Divizionun güclü komandalarından olan "Neftçala" ilə qarşılaşacaqsınız. Səncə əyalət təmsilçisinin bu oyunda sürpriz etmək şansı var?
Bu futboldur, kim yaxşı oynasa, o da qalib olacaq. Mən eşitmişəm ki, "Neftçala" yaxşı komandadır. Amma nə olur-olsun, çalışacağıq, sürprizə imkan verməyək.
