"Qarabağ"ın qapıçısı Fərhad Vəliyevin Korner.az saytına müsahibəsi
– Premyer Liqanın 19-cu turu çərçivəsində səfərdə "Qəbələ" ilə heç-heçə etdiz. Bu matçla bağlı fikirlərini bilmək istərdim.
Çox gərgin oyun oldu. Hər iki tərəf axıra kimi mübarizə apardı. Məncə, ədalətli heç-heçə oldu. Biz "Qəbələ" ilə oyuna 3 xal dalınca getmişdik. Ancaq 1 xal da pis nəticə deyil.
– "Qəbələ" qapınıza kruyoz qol vurdu. Bu qolda sənin də səhvin az deyildi.
"Qəbələ" bizim qapımıza qeyri-adi qol vurdu. Mən həmin epizodda əlimdən gələni etdim. Bəlkə də, ola bilər, müdafiəçi ilə bir-birimizi başa düşmədik. Bu qolda mənim fikrimcə, heç kimi günahlandırmaq olmaz.
– Qarşıda sizi öz meydanınızda "Sumqayıt"la oyun gözləyir. "Sumqayıt" iddiasız klub olsa da, "Bakı" ilə heç-heçə etdi.
"Sumqayıt"ın "Bakı" ilə oyununa baxmışam. "Sumqayıt" yaxşı təsir bağışladı. Birinci dövrədə də yaxşı çıxış edirdi. "Neftçi"ni məğlub etmişdi. Çalışacağıq ki,bu oyundan 3 xalla ayrılaq.
– Səncə, bu il "Qarabağ" çempion ola biləcəkmi?
Prezidentimiz bu il qarşımıza çempion olmağı məqsəd qoyub. Buna görə də biz əlimizdən gələni edəcəyik ki, çempion olaq. Hamı bilir ki,"Qarabağ" neçə illərdir çempion ola bilmir. Çalışacağıq kİ, bu həsrətə son qoyaq.
– Sən özün necə, komandadan razısan?
Əlbəttə, razıyam.Biz Antalyada da yaxşı toplanış keçdik. Yeni transferimiz Renaldo da komandaya qoşulub. İnanıram ki, onun komandamıza çox böyük xeyri dəyəcək. Kristian Torres Antalyada zədələnmişdi. O da yaxın günlərdə komandamıza qoşulacaq.
– "Simurq" və "İnter"in turnir cədvəlində sizdən öndə olması narahat etmir?
Biz də istəyirik ki, yuxarıdakı komandalarla xal fərqimizi azaldaq. Hələ "İnter"lə oyunumuz var. Çalışacağıq ki, mövsümün sonunu lider kimi tamamlayaq.
Adil Mirzəzadə
