25 avqustda "Xəzər Lənkəran" – "Neftçi" matçından sonra saxlanılan 7 azarkeşin dünən gizli şəkildə yekun məhkəməsinin keçirildiyini xəbər vermişdik.
Korner.az-ın məlumatına görə, Lənkəran rayon məhkəməsi "Xəzər Lənkəran"ın ən fəal azarkeşlərindən Eliko Ləzgineç ləqəbi ilə tanınan Elman Tağıyevi 3 illik azadlıqdan məhrum edib.
Məsələ ilə bağlı Elmanın anası Emilya Şərifova ilə əlaqə saxladıq. Emilya xanım yekun məhkəmə vaxtının onlara dəqiq deyilmədiyini, appellasiya məhkəsinə şikayət edəcəklərini və prezidentə məsələ ilə bağlı müraciət edəcəyini bildirib:
"Dünən saat 5-də gizli şəkildə məhkəmə keçiriblər və yekun hökm oxunub. Mənim oğluma 3 illik iş kəsiblər. Ədalətsiz qərar veriblər. Məhkəmənin qərarını apellasiya məhkəməsinə verəcəyik. Tez bir vaxtda da cənab prezidentə müraciət edəcəm".
Emilya xanım Elikonun azadlığa çıxması üçün dəstək olan dostlarına da təşəkkür edib:
"Qərar barəsində xəbərimiz olandan bəzi dostları Elikonun azadlığa çıxması üçün çox çalışırlar. Bəzi uşaqlar imzalar toplamağa başlayıblar. Hamısına ayrıca təşəkkür edirəm. Çox sağ olsunlar".