Milli komandamızın və Moldovanın “Milsami” klubunun futbolçusu Elhad Nəzirlinin Korner.az saytına müsahibəsi.
– Futbola İbrahim Dadaşovla, İslam Kərimovun rəhbərliyi altında başlamışam. İlk klubum "Neftçi" olub. Sonra isə "Qarabag"a keçmişəm. Burada bir müddət əvəzedici heyətdə oynadım. Əsas komandaya Rasim Kara gəldikdən sonra məni əsas heyətə cəlb etdi. Sonra isə yenidən "Neftçi"ylə müqavilə bağladım. Ancaq az sonra ayağımdan zədə aldım və 1 il futbol oynamadım. Zədəm sağalandan sonra isə əsas heyətə düşə bilmədiyimdən, "Neftçi"ylə yollarımı ayrılıb "Turan"a gəldim. Amma tovuzlularla müqavilə bağlamadım. Moldovaya baxışa getdim və "Milsami" klubuyla razılığa gəldik.
– Artıq milli komandaya da dəvət alırsan. Yığmanın cari tsikldəki çıxışı haqda nə deyə bilərsən?
– Hələ ki İsraillə oyundan başqa, bütün qarşılaşmaları səfərdə oynamışıq. İnşallah, çalışacağıq ki, seçmə mərhələdə maksimum xal toplayaq. İrlandiyayla oyunda axırıncı dəqiqələrdə buraxdığımız qol hamımızı üzdü. Almaniyanı Avropa çempionu etmiş məşqçi zəif ola bilməz. Mən Foqts kimi bir məşqçi ilə işlədiyim üçün xoşbəxtəm.
– Azərbaycan futbolunun səviyyəsi ilə Moldova futbolunun səviyyəsi arasında fərq çoxdurmu?
– Azərbaycanda güclü deyə biləcəyimiz 6 klub var. Moldovada futbol oynamaq isə daha məsulliyyətlidir. "Milsami"ylə hələ 1 illik müqaviləm var. Hələlik burda qalmaq, gələcəkdə isə Avropanın daha güclü klubuna keçməyi düşünürəm.
– Varmı başqa klublardan təklif?
– Azərbaycandan təklif gəlib. Klubun adın çəkməyəcəm. Amma “ilk altılığa” oynayan klub idi. Hələlik Azərbaycana qayıtmaq fikrim yoxdu.
Adil Mirzəzadə
