Avropa Liqasının qrup mərhələsinin son turunda sabah Bakıda \”Qəbələ\”ylə qarşılaşacaq \”Krasnodar\”ın baş məşqçisi Oleq Kanonov oyunöncəsi mətbuat konfransında jurnalistlərin suallarını cavablandırıb.
İdmanxeber.com-un məlumatına görə, Kanonov sabahkı oyunda əsas heyətə şans verəcəyini deyib:
– Sabah əsas heyətə şans verəcəksiz?
– Əlbəttə, əsas hesətin üzvləri oynayacaq. Sadəcə, bir neçə zədəli oyunçu çıxış etməyəcək.
– \”Krasnodar\” artıq üzərinə düşən işin öhdəsindən gəlib. Bakıdakı matça formal oyun kimi baxmırsız ki?
– Bu oyunda qazanılacaq qələbə bizə qrupda 1-ci yeri tutmağa imkan verəcək. Bu da, bizim növbəti mərhələdə nisbətən zəif rəqiblə oynamağımıza şərait yaradacaq.
– Bu gün Vanderson sizinlə birgə mətbuat konfransına gəlib. Bu onun əsas heyətdə meydana çıxacağından xəbər verir?
– Bəli, Vanderson son oyunlarda yaxşı çıxış edir. Sabah ona start heyətində şans verməyi düşünürəm.
– \”Spartak\” və \”Kuban\”la oyunlarda komanda yaxşı təsir bağışlasa da, bu oyunlarda 5 qol buraxdı. Komandanın müdafiəsindəki problemlərin səbəbi nədi? Rəhbərlikdən yeni transferlər tələb edəcəksiz?
– Qol buraxmadan qalib gəldiyimiz oyunlarımız da olub. Müdafiədə elə də çox seçimim yoxdu. Ona görə də, hücuma daha çox güc veririk. Ancaq arxa xətdə daha diqqətli oynamalıyıq. \”Borussiya\” ilə oyunlarda olduğu kimi.
– Sizcə də \”Krasnodar\”ın \”Borussiya\”ya qarşı sərgilədiyi oyun komandanın son iki avrokubokdakı ən yaxşı matçı idi?
– Mən belə düşünmürəm. Əvvəlki mövsümdə \”Real Sosyedad\” və \”Everton\”la oyunlarda da yaxşı oyun sərgiləmişdik. Əvvəlki mətbuat konfransında da demişdim. \”Borussiya\” indiyə kimi qarşılaşdığımız rəqiblər arasında ən güclülərdən idi.
– \”Qəbələ\” haqda nə fikirləşirsiz?
– \”Qəbələ\” çox güclü rəqibdi. Bu komanda Rusiyada da maraqla qarşılanır. \”Qəbələ\” bizlə ilk matçda da yaxşı oyun sərgiləmişdi.
– Krasnodardakı ilk oyundan sonra \”Qəbələ\”nin hansı oyunlarını izləmisiz?
– PAOK-la və ölkə çempionatında \”Xəzər Lənkəran\”la oyunu izləmişəm.
– Sabah hansı oyuna üstünlük verəcəksiz.
– İndidən bu barədə danışmaq istəmirəm. Ancaq onu deyə bilərəm ki, komandanın oyun sistemində ciddi dəyişiklik olmayacaq.
– Komanda artıq qrupdan çıxıb. Sabahkı oyunda hansısa eksperimentlərə şahid ola bilərik?
– Eksperimentlər adətən yoxlama oyunlarında olur. Bu oyun isə bayaq da dediyim kimi bizim üçün vacibdi.
