Ötən mövsümlə müqayisədə bu il “Liverpul” üçün çox uğursuz keçir. Klub Çempionlar Liqasında “Bazel”lə (!) mübarizədə qrupdan çıxa bilmədi, hazırda İngiltərə Premyer Liqasında lider “Çelsi”dən nə az, nə çox, düz 17 xal geri qalır! Keçən il çempion olmasa belə, mövsümü fantastik səviyyədə keçirən komandanın birdən-birə bu qədər geriləməsi azarkeşlərdə təcəcüb doğurmaya bilməz. Problemin kökünü mərhələli şəkildə araşdırmaq pis olmazdı.
Hələ yayda “Liverpul”a böyük itki üz vermişdi. Belə ki, 2013\2014 sezonunda qapıçıların qəniminə çevrilmiş Luis Suares “Barselona”nın yolunu tutdu. Sözün düzü, “yekədiş” İngiltərədə qalsaydı belə, DÇ-2014 zamanı aldığı cəzaya görə mersisaydlara yalnız oktyabrdan sonra kömək edə bilərdi. Əslində, “Liverpul” yay transfer pəncərəsində çox fəal idi. Lakin bu da var ki, komandanın transferlərə təxminən 70-80 milyon avroya yaxın pul xərcləməsi hələ keyfiyyət göstəricisi deyil. Yaxşı olardı ki, 7-8 ortabab futbolçudansa, səviyyəli 1-2 oyunçu alınaydı. Yox, mən heyətə cəlb olunanların tamamilə “çürük alma” olduğunu iddia etmirəm. Riki Lambert, Adam Lallana, Deyan Lovren,( hamısı “Southempton”) Alberto Moreno (“Sevilya”), Lazar Markoviç (“Benfika”), Əmrə Can (“Bayer L.”) yaxşı və perspektivli futbolçulardı. Lakin perspektiv hələ NƏTİCƏ demək deyil. Birdən-birə bu qədər hələ futbolda sözünü tam deməmiş şəxslərin transferi heyətin sınaq poliqonuna çevrilməsi, mövsümün boşa verilməsi demək idi. Yaydan gələnlər arasında ən çox səs-küy doğuranı və zənnimcə, ən lazımsızı Mario Balotelli idi. Həmin şəxsi qeyri-peşəkarlıq dəfələrlə gündəmə gəlib və belə davam edəcəyi təqdirdə futbolu birdəfəlik atsa, daha yaxşı olar. Düzdür, onun istedadlı olmasını heç kim inkar edə bilməz, amma belə hərəkətləri ilə yalnız özünə ziyan vurur və günü-gündən insanların gözündən düşür. Mario bu mövsüm cəmi 2 qol vurub, (1-i Liqa Kubokunda, digəri isə Çempionlar liqasında). Premyer Liqada 12 dəfə forma geyinən (8-i start heyətində) Mario heç nə ilə yadda qalmayıb. Hücumçu üçün gülməli rəqəm deyilmi? Transferinə 22 milyon avro pul ödənən birinin bu qədər zəif nəticə göstərməsinə nə ad verək? Üstəlik, ərköyünlüyündən də qalmır. Belə ki, sosial şəbəkədə yəhudilər əleyhinə irqçi paylaşım etdiyinə görə “Arsenal”la matçı (2-2) buraxmalı olmuşdu. Futbolda emosinallığa və qeyri-peşəkarlığa yer yoxdur. İtalyan futbolçu sadəcə öz istedadını məhv edir.
Komandada amplualar üzrə vəziyyətə baxaq:
Qapıçı
“Liverpul” mövsüm üçün cəmi 2 qapıçı sifariş edib: Simon Minyole və Bred Cons. Belçika millisinə də mütəmadi dəvət alan Simon Minyole yaxşı və sabit oyun sərgiləyən qapıçıdır, buna söz yox, amma mövsüm boyu ona güvənmək olmaz axı! Hamı kimi o da zədələr və cəzalardan sığortalanmayıb. Avstraliyalı Bred Consun adını isə bəlkə də, birinci dəfədir eşidirsiz. Minyolenin əvəzləyicisi kimi ortabab qapıçı transferi mütləqdir.
Müdafiə
Müdafiə planında “Liverpul”da vəziyyətin yaxşı olduğunu qeyd etsək, yanılmarıq. Hazırda mersisaydlıların heyətində 8 müdafiəçi var. Onların arasında Martin Şkrtel, Kolo Ture, Alberto Moreno, Deyan Lovren ilk baxışdan nəzərə çarpır.
Yarımmüdafiə
Bu mövqe üçün “Liverpul”da ciddi problem yoxdur. Ötən mövsüm ikinci dəfə “dirçələn” Stiven Cerardın gələn mövsüm “Liverpul”dan ayrılacağını açıqlaması klubun azarkeşləri üçün əsl şok oldu. Cerardın bu cameədə nə qədər önəmli fiqur olduğunu qeyd etməklə vaxtınızı çox almaq istəmirəm, amma o bu addımı ən doğru zamanda atdı. Çünki artıq yaş öz sözünü deyir və bundan sonra Stiven “Liverpul” üçün artıq yük idi. Cerard isə karyerasının qürub çağında Amerikada ciblərini yaxşıca dolduracaq. Koutinyo, Adam Lallana, Cordan Henderson, Əmrə Can üzərlərində işləsələr, Cerardın layiqli əcəzləyicisi ola bilərlər. Qeyd edək ki, “Liverpul” bu mövsüm üçün 7 yarımmüdafiəçi sifariş verib.
Hücumçu
“Liverpul”un hücum xətti ilə bağlı qəribə paradoksallıq hökm sürür. Bu mövqedə oynayan yaxşı futbolçulara sahib olmasına baxmayaraq, Suaresin gedişindən sonra mersisaydlılar əvvəlki hücum gücünü ortaya qoya bilmir. Böyük perspektiv vəd edən Starric və Sterlinq üzərlərində işləsələr, gələcəkdə “Liverpul”un əfsanələri ola bilərlər. “Benfika”dan alınan Lazar Markoviçin də böyük gələcəyi var. Qeyd edək ki, “Liverpul” bu mövsüm üçün 7 hücumçu sifariş edib.
Ümumi tanışlıq
“Liverpul”un bu mövsüm ən çox qol vuran futbolçuları
Ürfan Məmmədzadə
