Topaz Premyer Liqasının III turu çərçivəsində avqustun 19-da səfərdə “Sumqayıt”la qarşılaşacaq “Qəbələ” indiyədək bu rəqibiylə 5 dəfə qarşılaşıb və hamısında qalib gəlib.
Korner.az-ın məlumatına görə, qəbələlilər Sumqayıtın eyniadlı klubunun qapısından 10 top keçirib ki, bunlardan ikisi Dodonun ayağına yazılıb.
Bu mənada “Sumqayıt”ın Dodo üçün xüsusi yaddaqalan rəqib olduğunu söyləmək olar. Futbolçu gabalafc.az-a açıqlamasında bu fikri təsdiqləyib: “Sumqayıt” “Qəbələ” karyeramda qapısına yol tapdığım ilk komandadır. Bu baxımdan sözügedən rəqib və qol xüsusi yadımda qalıb. Ümumiyyətlə, “Sumqayıt”la oyunlarımız həmişə maraqlı alınıb. Sevindirici haldır kı, bütün matçlarda yekunda sevinən tərəf biz olmuşuq”.
Dodo növbəti oyunda da fərqlənmək arzusunda olduğunu, komanda olaraq uğurlu seriyanı davam etdirmək istədiklərini bildirib:
“Mövsümə uğurlu start verdik. İki mühüm qələbə qazandıq. Qələbə seriyamızı davam etdirmək əzmindəyik. Digər komanda yoldaşlarım kimi mən də istəyirəm ki, bu matçda fərqlənim. Amma “Qəbələ”nin 3 xal qazanması mənim də, digər futbolçuların da fərdi uğurundan daha önəmlidi. İnanıram kı, kollektiv olaraq növbəti qələbə hədəfimizə nail olacağıq”.
