“Çox çalışdıq, Allah da bizə pay verdi” – Samir Abasov
05.10.2018 , 20:36
“Əvvəlcə rəqib barədə danışmaq istəyirəm. Tək-tük olan şeydir. Bu komandadan çox xoşum gəldi”
Bu sözləri “Zirə”nin baş məşqçisi Samir Abasov deyib. Gənc mütəxəssis Topaz Premyer Liqasının VII turunda “Qəbələ” üzərində 1:0 hesablı qələbəni şərh edib.
“Qəbələ”nin düşdüyü bu durumu məndən yaxşı bilən olmaz. Çünki biz də eyni vəziyyətdəyik. “Qarabağ”la layiqincə rəqabət aparacaq bir nömrəli komanda “Qəbələ”dir. Çempionluğa oynamağa layiqdilər. Əfsuslar olsun ki, bu yerdədilər. Bizim oyunumuza gəlincə, uşaqlar bu matça özləri özlərini hazırlamışdılar. Həftəiçi bir yumruq kimi birləşdilər, istəkli idilər. Çoxdandır gözlədiyimiz qələbəni də qazandılar. Çox çalışdıq, Allah da bizə pay verdi. Bəzi oyunçular bizi “üzür”. Bəzi məqamları meydanda görmək istəmirəm. Onlara deyirəm ki, meydana çıxanda bilməlisiz ki, kim nə etməlidi. Neqativdən danışmaq istəmirəm. Bu günkü mübarizəyə görə onlara halal olsun. Sağ olsunlar. “Zirə”nin fanatları, bizi sevən “Sumqayıt”lılar bunu gözləyirdilər”.
Abasov sonradan meydana daxil olan Vüsal İskəndərlinin son dəqiqələrdə əvəzləməsinin səbəbini də açıqlayıb: “Cinahda Bilalın effekti azalmışdı, onun yükü artırdı. Sürətli, texnikalı futbolçudur. Sağ cinahı daha da gücləndirmək üçün belə addım atdıq. Hücumlarımızı daha da şiddətləndirmək istədik. Başqa bir səbəbi yoxdu”.