“Neftçi”nin sabiq baş məşqçisi Böyükağa Hacıyev yenidən qalmaqallı açıqlamalar verib.
Korner.az-ın məlumatına görə, “Space” telekanalında yayımlanan “Qol” verilişinin qonağı olan mütəxəssis cari mövsümün əvvəlində “Neftçi”nin “Araz Naxçıvan”a qəsdən uduzduğunu deyib.
O dövr “Neftçi”də baş məşqçi işlədiyini xatırladan Hacıyev məğlubiyyətin (0:3) səbəbini belə izah edib: “Mən 15 il kapitanlıq sarğısını daşıdığım komandanı məğlub edə bilməzdim. Bunu etiraf edirəm. Elə o səbəbdən də “Araz Naxçıvan”la oyun üçün Naxçıvana getmədim. Mən futbolçularıma deməmişdim ki, “Araz Naxçıvan”a uduzun. Ancaq qəsdən ora ikinci heyəti göndərmişdim. Həmin futbolçular da bilirdilər ki, mən 15 il “Araz Naxçıvan”ın kapitanı olmuşam. Yenə deyirəm ki, mənə bu qədər doğma olan komandaya qalib gələ bilməzdik. Bu gün də hərəkətimə görə peşman deyiləm”.
“Neftçi”də Müşahidə Şurasının yaradılmasına da münasibət bildirən Hacıyev Çingiz Abdullayevin “Neftçi”yə rəhbərlik etməsini düzgün hesab etmədiyini bildirib: “Neftçi” bütün uğurlarına görə, Sadıq Sadıqova borcludur. İkinci dəfə bu kluba onun kimi prezident gəlməyəcək. Çingiz Abdullayevə böyük hörmətim var. O, çox yaxşı yazıçıdır. Dedektiv janrda çox gözəl əsərləri var. Ancaq futbol da bir elmdir. Artıq futbol oyun çərçivəsindən çıxıb. İnsan gərək hansı işə girişdiyinə fikir versin. Çingiz Abdullayevin “Neftçi”ni necə idarə edəcəyini zaman göstərəcək”.
