Bizimkilər “Hürriyet”ə danışdı: “Biz belə qrip görməmişdik”

 Türkiyə PTT Birinci Liqasında mübarizə aparan "Dənizlispor"un şərəfini qoruyan millimizin iki sabiq üzvü Rail Məlikovla Arif İsayev sağalaraq komandasının heyətinə qatılıblar.

Korner.az-ın məlumatına görə, bu ölkənin “Hürriyet” qəzetinin diqqət mərkəzinə düşən futbolçularımız verdiyi açıqlamada "Biz belə qriplə üzləşməmişdik. Addım atmağa halımız yox idi. Ancaq indi yaxşı vəziyyətdəyik. Baş məşqçimiz şans versə, “Rizəspor”a qarşı oynamaq istəyirik” – deyiblər.

Daha sonra qəzet futbolçularımız haqda bunları qeyd edib:

"Təxminən 10 gün əvvəl demək olar ki, komandanın yarısını əhatə edən qrip epidemiyası bu iki futbolçunu da yatağa saldı. 40 dərəcə istiliklə düz dörd gün xəstə yatan Məlikov Bolu səfərinə aparılmadı. Ayağındakı zədə səbəbindən üç həftə komandadan ayrı qalan İsayev də zədəsini sağaltmasına baxmayaraq, qrip qurbanı oldu və son anda Bolu səfərinə gedəcək heyətindən çıxarıldı. Ciddi müalicə nəticəsində sağlamlıqlarına qovuşan futbolçular “Rizəspor” matçında meydana çıxmaq üçün hazır olduqlarını ifadə ediblər”.