“Beyl Azərbaycanla oyuna qədər hazır olacaq” – Giqqz
06.11.2019 , 19:58
AVRO-2020-nin seçmə mərhələsində Azərbaycan və Macarıstan ilə qarşılaşacaq Uels millisinin baş məşqçisi Rayan Giqqz Qaret Beylin zədəli olması ilə bağlı xəbərlərə aydınlıq gətirib.
Korner.az-ın məlumatına görə, O, hücumçunun sağlam olduğunu bildirib:
“Beyl mənə Azərbaycanla oyuna qədər fiziki cəhətdən hazır olacağını deyib. Onun milliyə qədər “Real”ın heyətində ən azı “Eybar”la matça çıxması bizim üçün ideal olar”.
Beyl Uelsin oktyabrın 13-də Xorvatiya ilə Kardiffdə 1:1 hesablı heç-heçə etdiyi matçda baldır əzələsindən təkrar zədə alıb. O, İspaniya təmsilçisi “Real Madrid”in heyətində son 4 oyunu buraxıb.
Noyabrın 16-da “Bakcell Arena”da keçiriləcək Azərbaycan – Uels oyunu saat 21:00-da başlayacaq.
