Foqts nəyə hirsləndi?
“Burda 1 xalı qazanmaq asan deyildi. Bizi güclü rəqib gözləyirdi, rəqib şanslarından istifadə edə bilmədi. Bizim də 2-ci qolu vurmaq şansımız vardı”.
Korner.az -ın məlumatına görə, bunu Azərbaycan yığmasının baş məşqçisi Berti Foqts deyib.
Millimiz az öncə dünya çempionatının seçmə qrup mərhələsində Şimali İrlandiya ilə qarşılaşdı. Komandamız hesabı erkən açmasına baxmayaraq, son saniyələrdə buraxılan qolla qələbə hesabını saxlaya bilmədi.
Oyundan sonra keçirilən mətbuat konfransında Foqts hirsini nümayiş etdirib: “60-cı dəqiqədə oyunu dayandırdıq, buna görə hirslənmişəm. Azərbaycan beynəlxalq səviyyədə sona kimi oynamalıdır. Məncə, əlavə 6 dəqiqə düzgün idi. Futbol tanrısı bu gün Şimali İrlandiyaya 1 xal bağışladı. Oyundan öncə 1 xalla razı olardım. Ancaq indi çox hirslənmişəm ki, 1 xal qazanmışam. Ancaq komandam gəncdir və bu gün heyətdə 2 yeni futbolçu gordük”.
Alman çalışdırıcı bildirib ki, 60 dəqiqəyədək komandadan razı qalıb: “Bundan sonra səhvlər artdı. Futbolçularımız belə yağışlı havada oynamağa öyrəşməyib. Rəqib gözlənildiyi kimi güclü idi, hava şəraiti onlar üçün daha münasib idi”.
Xatırladaq ki, Şimali İrlandiya – Azərbaycan matçı 1:1 hesabı ilə başa çatıb.
