Topaz Premyer Liqasının XXXI turu çərçivəsində keçirilmiş “Qəbələ” – “Neftçi” oyununda 1:1 hesabı qeydə alınıb və bu nəticədən sonra çempionatın sonuna 1 tur qalmış “Neftçi” komandası ardıcıl üçüncü dəfə çempion olub.
Korner.az-ın məlumatına görə, bununla bağlı Azərbaycan milli komandasının baş məşqçisi Berti Foqts “Neftçi”ni təbrik edib.
AFFA-nın saytına açıqlamasında o deyib ki, artıq əksər çempionatlar finiş xəttinə yaxınlaşmaqdadır və bir sıra ölkələrdə çempion komandalar müəyyənləşib:
“Dünən “Qəbələ” ilə səfər oyununda vacib bir xalı əldə edən “Neftçi” növbəti dəfə Azərbaycan çempionu adını qazandı. Sona bir tur qalmış çempionluğunu rəsmiləşdirən “Neftçi” ardıcıl üçüncü dəfə bu nailiyyətə imza atmaqla son illərdə sabit çıxış etdiyini, qazanılan nəticələrin təsadüfi olmadığını bir daha sübuta yetirdi. Klubun rəhbərliyini, məşqçi heyətini, futbolçularını və azarkeşlərini növbəti çempionluq münasibətilə təbrik edir, UEFA Çempionlar Liqasında uğurlar arzulayıram”.
