Dünən "Bakı" ilə yoxlama matçı keçirən Madrid “Atletiko”sunun yarımmüdafiəçisi Tyaqu Mendes oyundan sonra jurnalistlərin suallarını cavablayıb.
– Əla oyun alındı. Qələbə qazandığımıza görə çox sevinirəm. Bu gün İspaniya və Azərbaycan futbolu arasında böyük fərq var. Bu təcrübədən Azərbaycan futbolu yararlanaraq inkişaf edəcək.
– İlk hissədə “Atletiko” hücuma keçərkən yan xətt hakiminin dəfələrlə ofsayd qərarı ilə üzləşdiniz. Sizcə, verilən qərarlar doğru idi?
– Bu haqda nə isə demək istəmirəm. Çünki bu, bir bayram əhval-ruhiyyəsində keçirilən oyundur. Biz bura hakimlikdən şikayətlənməyə gəlməmişik. Ancaq oyunda dəqiqədə bir ofsayd qərarı verilməsi tempi öldürürdü…
– Azərbaycanlı futbolçulardan diqqətinizi çəkən oldu?
– Hücumçu və oyun qurucusunu fərqləndirərdim. Səhv etmirəmsə, pleymeykerinizin nömrəsi 11 idi (Elvin Məmmədovu nəzərdə tutur).
– Azərbaycan futbolu neçə ilə İspaniya səviyyəsinə çata bilər?
– Bu elə şeydir ki, aşağı yaş qruplarından başlayaraq düzgün iş qurulmalıdır. İnkişaf gendən gələn bir şeydir. Aşağı yaş qrupunda işlər düzgün görülsə, əsas komandalarda da inkişaf öz sözünü deyəcək. Böyüklərdən birdən-birə nəticə gözləmək düzgün deyil.
– 3:0 bayram əhval-ruhiyyəli oyun üçün böyük hesablı nəticə deyil ki?
– Yox, yaxşı nəticədir (gülür).
– Rəhbərlikdən sizə “Bakı”ya az qol vurmaq tapşırığı verilməmişdi?
Biz sadəcə, “Bakı”ya çox qol vurmaq istəmədik.
– Ölkəmizə gəlməzdən öncə Azərbaycan futbolu haqda nə bilirdiz?
– Bir dəfə oyununuza baxdım. O da Azərbaycanla Portuqaliya yığmasının Bakıdakı son görüşü idi. Matçı televizordan canlı izləmişdim. Həmin qarşılaşma bizimkilər üçün çox çətin keçmişdi. Yeri gəlmişkən, sizin hər birinizə çox təşəkkürümü bildirmək istəyirəm. Çünki siz burda olduğumuz müddətdə bizim üçün hər bir şəraiti yaratdız, öz qonaqpərvərliyinizi göstərdiz.
