“Bakı”dakı maliyyə problemləri barədə xəbər vermişdik. Məhz bu səbəbdən futbolçular “Qəbələ” ilə oyuna çıxmaqdan imtina etmişdi. Lakin klub rəhbərliyinin müdaxiləsindən sonra əksər futbolçuları oynamağa razı salmaq mümkün olmuşdu.
Korner.az-ın məlumatına görə, maliyyə böhranında olan Hafiz Məmmədov yüksək ödənişli yerli və əcnəbi futbolçularla vidalaşmaq niyyətindədi.
Artıq “Bakı”nı tərk etməsi gözlənilən çox sayda futbolçunun kimliyi müəyyənləşib. Yerlilərdən Rauf Əliyev, Əfran İsmayılov, Cavid Hüseynov və Elvin Məmmədov yeni mövsümə böyük ehtimalla başqa klubda başlayacaq. Onların gedişinə səbəb maliyyə problemləri ilə yanaşı, həm də baş məşqçi Milinko Pantiçlə yola getməmələridi.
Legionerlərə gəlincə, qapıçı Edin Nurediounski artıq “Bakı”nı tərk edib. Məlumatlara görə, Etto, Marius Pena, Risto Ristoviç, Albert Noquera, Mario Alvares, Aleksandr Soliç və Mario Martines kimi yüksək ödənişli futbolçular da mövsümün sonunda yola salınacaq.