“Portu”dan icarəyə götürülən Marat İzmayılovun “Qəbələ” ilə müqaviləsi başa çatır.
Korner.az-ın məlumatına görə, artıq bölgə klubu rusiyalı futbolçu ilə bağlı qərarını verib.
“Qəbələ” Avropa Liqasına vəsiqə qazanıb və beynəlxalq arenadakı ilk mövsümündə uğurlu çıxış etmək istəyir. Bunun üçün isə təcrübəli futbolçulara ehtiyac var. Bu səbəbdən rəhbərlik və baş məşqçi Yuri Syomin Maratın qalmasını istəyir. Amma ilk növbədə futbolçunun özü və “Portu” buna razılıq verməlidi.
Məlumata görə, Marat əvvəlki formada olmadığını və Portuqaliyaya dönəcəyi halda əsas heyətdə özünə yeni edə bilməyəcəyini yaxşı başa düşür. Bu səbəbdən rusiyalı futbolçu yaxşı maliyyə şərtləri qarşılığında “Qəbələ”də qalmağa razıdı. Artıq klub rəhbərliyi “Portu” ilə də danışıqlara start verib. Portuqaliya klubunun maliyyə tələbləri sərfəli olsa, İzmayılovun transferi reallaşacaq.
Qeyd edək ki, qışda icarəyə götürülən Marat Premyer Liqada 13 oyuna çıxıb və 912 dəqiqə oynayıb. O, ölkəmizdəki ilk və hələlik son qolunu XXXIV turda “Bakı”nın qapısına vurub. Rus futbolçu Azərbaycan Kubokunda da 3 oyuna çıxaraq 249 dəqiqə oynayıb.
