“Bakı” klubu daha bir mötəbər beynəlxalq qurumun üzvlüyünə qəbul olunub.
Korner.az-ın klubun rəsmi saytına istinadən verdiyi məlumata görə, Azərbaycanda Amerika Ticarət Palatası (American Chamber of Commerce in Azerbaijan – qısa olaraq AmCham) klubun fəaliyyətini diqqətlə izləyib və analiz edib “Bakı”nı sıralarında görməkdən məmnun olduğunu açıqlayıb. Bu barədə AmCham-ın icraçı direktoru Nərgiz Nəsrullayeva məlumat verib.
Azərbaycandakı Amerika Ticarət Palatası (AmCham) ölkəmizdə biznes maraqlarını dəstəkləyən və təşviq edən nüfuzlu iş birliyi kimi tanınır. Əsası 1996-cı ildə qoyulmuş Amcham Azərbaycan iqtisadiyyatının bütün sahələrini əhatə edən 251 aparıcı şirkəti özündə birləşdirir. Təşkilatın məqsədi Azərbaycanı dünyada tanıtmaq, ölkəmizdə fəaliyyət göstərən biznes qurumlarını müxtəlif yönlü sosial-iqtisadi layihələrə dəvət etməkdir.
Coca Cola, JW Marriott Absheron, Ernst & Young, Chevron, P&G, Bakcell, ZQAN, British American Tobaco, ConocoPhillips və s. böyük şirkətlər AmCham üzvləri sırasında yer alır.
Bu gün Hyatt mehmanxanasının Quba zalında AmCham-ın illik toplantısı (Luncheon) keçiriləcək. Görüşdə quruma qoşulan yeni üzvlərin təqdimatı yer alacaq. Eyni zamanda günün aktual məsələləri, qarşılıqlı əməkdaşlıq və təcrübə mübadiləsi barədə diskussiyalar aparılacaq.
Tədbirin fəxri qonağı Azərbaycan Respublikası Milli Məclisinin deputatı, Milli Məclisin İqtisadi Siyasət Komitəsinin sədri, AMEA-nın həqiqi üzvü, iqtisad elmləri doktoru, akademik Ziyad Səmədzadədir. Tədbirə rəsmi dəvət alanlar arasında “Bakı” da var.
Qeyd edək ki, “Bakı” AmCham sıralarına qəbul olunan ilk idman təşkilatıdır.
