Bu gün "Bakı-2015" I Avropa Oyunlarında cüdo üzrə yarışlarda daha 5 çəki dərəcəsində idmançılar mübarizə aparacaqlar.
Korner.az-ın məlumatına görə, Azərbaycanın 5 cüdoçusu 4 çəkidə medal qazanmağa çalışacaq.
Cüdo
27 iyun
Kişilər
90 kq
İlk mərhələdən azad olan Ramin Qurbanov mübarizəyə 1/16 finaldan qoşulub. Qurbanov, özü kimi, bu mərhələdən yarışa qatılan portuqaliyalı Çelio Diasla qarşılaşıb. Görüş həmyerlimizin inamlı qələbəsi ilə bitib. Qurbanov 70-ci saniyədə ipponla mərhələ adlayıb. O, 1/8 finalda Kriştian Totla (Macarıstan) mübarizə aparacaq.
100 kq
Bu çəkidə Azərbaycanın iki güclü cüdoçusu çıxış edir. Həmyerlilərimizdən öncə mübarizəyə Elxan Məmmədov qoşulub. Dünya çempionumuz 1/16 finalda Zlatko Kumriçlə (Xorvatiya) güləşib. Görüş idmançımızın asan qələbəsi ilə yekunlaşıb. Məmmədov 145-ci saniyədə rəqibini ippona salıb. O, 1/8 finalda Lukas Krpaleklə münasibətinə aydınlıq gətirib. Lakin Elxan bu dəfə ümidləri doğrultmayıb. O, ipponla uduzub.
*****
Bayraqdarımız Elmar Qasımov isə 1/16 finalı azarkeş qismində keçirib və növbəti mərhələdə Jorje Fonseka (Portuqaliya) ilə üz-üzə gəlib. Lakin Azərbaycan millisinin lideri gözlənilmədən məğlubiyyətə üzülüb. O, qarşılaşmanın başa çatmasına 24 saniyə qalmış ippona düşüb.
+100 kq
Bu çəkidə ölkəmizi təmsil edən Uşanqi Kokauri 1/16 finalda Matyaz Çerayla (Sloveniya) qarşılaşıb və döyüşünü qələbə ilə bitirib. O, görüşün başa çatmasına 57 saniyə qalmış rəqibini ippona salıb. Cüdoçumuz 1/8 finalda gürcüstanlı Levani Matiaşvilini sınağa çəkib. Təəssüf ki, bu dəfə Kokaurinin özü ippona düşərək, Oyunlardakı çıxışını başa vurub.
Qadınlar
78 kq
Millimizin üzvü Günel Həsənli 1/16 final mərhələsində dünya və Avropa çempionatlarında dəfələrlə iştirak etmiş Assunta Qaleone (İtaliya) ilə münasibətlərinə aydınlıq gətirib. Lakin onun debütü uğurlu alınmayıb. 92-ci dəqiqədə ippona düşən idmançı yarışa vaxtından əvvəl vida edib.
Qeyd edək ki, cüdo yığmamızın aktivində 1 gümüş medal var. 60 kq çəki dərəcəsində Orxan Səfərov yalnız finalda məğlub olub.
