Topaz Premyer Liqasının III turunda keçirilən oyunda “Qarabağ” AZAL-ı səfərdə 2-0 hesabı ilə məğlub etdi.
Tərlan Əhmədov (AZAL-ın baş məşqçisi): “Qarabağ” komandasını qələbə münasibəti ilə təbrik edir, onlara Avropa Liqasında uğurlar arzu edirəm. Biz bu gün məğlub olduq. Komanda uduzursa, burada günahkar məşqçidir. Komandamızın potensialı olsa da, problemlərimiz çoxdur. Həmin problemi yoluna qoymalıyıq. Futbol aqressiv oyundur. Hakimlik barədə danışmaq istəmirəm. Amma açığını deyim ki, bundan sonra susmayacağam. Hazırda klubumuz ağır günlərini yaşayır. Hakimlərin belə vəziyyətdə etdiyi səhvlərə dözə bilmirəm. Mənim heç bir şəxslə prinsipim yoxdur. Sadəcə, ədalət tərəfdarıyam”.
Qurban Qurbanov (“Qarabağ”ın baş məşqçisi): “Bizim üçün hər bir qələbə vacibdir. Çempionatın startında hər bir komanda istəkli olur. Bu gün rəqib bizə çətin anlar yaşatdı. Düşünürəm ki, xeyli dəyişikliklərin fonunda səhvlərimiz çox idi. Bu səhvləri aradan qaldırmaq mümkündür. Gün-gündən sayı çoxalan azarkeşlərimizə təşəkkür edirəm.
Mənə elə gəlir ki, heç bir oyunçu üçün getdiyi komandada tez bir zamanda özünü yaxşı tərəfdən göstərmək asan deyil. Sadəcə, deyim ki, yeni oyunçular çox istəklidirlər. Hesab edirəm ki, futbolçular faydalı olacaqlar”.
