Topaz Premyer Liqasında mövsümün 9-cu avtoqolu qeydə alınıb.
Korner.az-ın məlumatına görə, bu dəfəki bəxtsiz AZAL-ın futbolçusu Aylton olub.
İspan oyunçu 47-ci dəqiqədə – hesab 1:1 olarkən topu öz qapısına göndərib. Nəticədə “Bakı” matçı 2:1 hesablı qələbə ilə başa vurub.
Cari mövsümdə AZAL ən çox avtoqola məyus olan komandadı. Belə ki, bundan əvvəl Tural Nərimanovla Şəhriyar Rəhimov da “təyyarəçilər”i məyus etmişdi. 2013/14 mövsümündə “Sumqayıt”ın 2, “Xəzər Lənkəran”, “Bakı”, “Qəbələ” və “Neftçi”nin bir üzvü qapıları səhv salmışdı.
Ayltonun avtqolu AZAL-ı bu siyahıda birinci edib. Belə ki, XXVII turadək “Qarabağ”la AZAL Azərbaycan çempionatlarının tarixi ərzində ən çox avtoqola üzülən klublar idi – 11. İspan futbolçunun öz qapısına vurduğu top “təyyarəçilər”in ağdamlıları keçməsinə səbəb olub.
2005/06 mövsümündən Premyer Liqada çıxış edən AZAL-ın heyətində Usim Nduka 2, Abdulkader Kamara, Alveş Dos Santos, Ritus Krjauklis, Bronislav Arsenyeviç, Emin Ağaməmmədli, Aydın İslamov, Xuan Fransisko, Tural Nərimanov, Şəhriyar Rəhimov və Aylton 1 dəfə uğursuzluq yaşayıb. Bakı klubu yalnız 5 dəfə rəqib oyunçunun vurduğu qola sevinib.