Ölkəmizdə keçiriləcək 17 yaşlı qadınlar arasında dünya çempionatına hazırlıq məqsədi ilə hal-hazırda "Şəfa" stadionunda təmir işləri yekunlaşmaq üzrədi. Lakin bir maraqlı məqam bundan ibarətdir ki, bu stadionda Premyer Liqa oyunları keçirməli olan "İnter" yaranmış əlverişsiz vəziyyət səbəbindən ilk oyununu "AZAL Arena"da keçirdi. Bəs maraqlıdır "Şəfa" stadionunu "zəbt" edən AFFA "İnter"in "AZAL Arena"da oynaması üçün bu arenaya icarə haqqını özü ödəyibmi? "İnter" klubunun meneceri Səbuhi Səfiyarlı Korner.az-a açıqlamasında vəziyyəti belə dəyərləndirib:
"Təbii ki, icarə haqqını biz ödəmişik. "Şəfa" stadionu hələ bizim deyil. Stadionun bizə satılması haqda qərar qəbul edilib. Ancaq hüquqi cəhətdən qüvvəyə minmədiyindən biz AFFA-dan "Şəfa" stadionunu arendaya götürmüşük. Müqavilədə belə bir bənd var ki, milli səviyyəli oyunlarda biz arenanı AFFA-ya verməliyik".
Daha sonra AZAL-ın mətbuat xidmətinin rəhbəri Eldəniz Yusifovla əlaqə saxladıq. Klub rəsmisindən "İnter"in arenaya xərclədiyi icarə haqqının məbləğini öyrənməyə çalışsaq da, bu səylərimiz bir nəticə vermədi:
"Bu klubdaxili məsələdi. Qarşılıqlı müqavilə imzalanıb "İnter"lə. Bizim aşağı yaş qrupundan olan komandamız da "Şəfa"da məşq edir. Ona görə maliyyə məsələlərini mətbuata açıqlamırıq".
Səxavər QURBANOV
