DÇ-2014-ün təsnifat mərhələsində uğursuz çıxış edən Türkiyə millisinin baş məşqçisi postunda dəyişiklik olacaq.
Korner.az-ın məlumatına görə, bu iddiayla “Lig” TV-də yayımlanan “Maraton” proqramının aparıcısı Şansal Büyüka çıxış edib.
Büyüka dünən yayımlanan verilişdə bu posta Fatih Terimin gətiriləcəyini deyib. Onun sözlərinə görə, artıq Türkiyə Futbol Federasiyası Terimin “ağzını arayır”: “Federasiya rəhbərliyi Terimlə arası yaxşı olan sabiq TFF başqan vəkili Göksəl Gümüşdağ vasitəsilə Fatih Terimin fikrini öyrənib. Hətta onların arasında görüş də olub. Gümüşdağla danışmışam. Federasiyanın baş məşqçi postunda Terimi görmək istədiyini dedi. Ancaq TFF-də səlahiyyət sahibi olmadığından dəqiq bir söz deyə bilmir, “təklifi TFF edəcək” – deyir. “İmperator” ona deyib ki, “Qalatasaray”dan ayrılmaq istəmir. Ancaq həm millidə, həm də klubda işləmək məsələsinə müsbət baxır. Federasiya 48 saat ərzində Terimin qapısını elə bu təkliflə döyəcək. İstəyirlər ki, 2014-cü ilin sonuna qədər həm “Qalatasaray”da, həm də yığmada olsun. Ondan sonra hansı işi istəsə, onu da seçə bilmək imkanı veriləcək”.
