“Qarabağ”ın gənc yarımmüdafiəçisi Tural Rzayevin klubun rəsmi saytına müsahibəsi
Tural, futbola gəlişini necə xatırlayırsan?
Hamı kimi mən də Tofiq Bəhramov adına Respublika stadionunda keçirilən məşqlərə qatılmışam. Bir müddət Vətən Futbol Məktəbində futbolun sirlərinə yiyələndikdən sonra “Qarabağ”a gəlmişəm. Burada ilk ilimdə 15 yaşlılar arasında ölkə çempionluğunu qazanmışam. Üzərimdə haqqı olan bütün məşqçilərə təşəkkür edirəm.
Bəs, “Qarabağ”ın əsas komandasına dəvət almağın necə oldu?
Evdə idim, zəng gəldi. Koordinatorumuz Sabahettin Tekin mənə dedi ki, əsas komanda ilə məşqə çıxacaqsan. Evdən məşqə gələn müddətdə yolboyu düşünürdüm ki, görəsən necə olacaq. Həm sevincli, həm də bir qədər həyacanlı idim. Bazada ilk olaraq Sabahettin bəyin otağına qalxdım. Mənə inandığını dedi və öz məsləhətlərini verdi. Mənə forma verdilər və məşqə getmək üçün aşağı düşdüm. Maraqlı mənzərə idi. Həmişə televiziyada gördüyüm simalarla yanaşı dayanmışdım. Avtobusa qalxdım, salam verdim və utandığımdan sakitcə keçib arxada əyləşdim. Həmin gün baş məşqçi Qurban Qurbanovla demək olar ki heç danışmadıq. Salamlaşıb məşqə başladım. Ancaq sonra mənimlə ətraflı söhbət etdi. O, mənə dedi ki, tapşırıqlarımı dəqiq yerinə yetirsən, yaxşı olacaq.
Ancaq hələ ki, əsas komandada debüt edə bilməmisən…
Bir neçə yoldaşlıq oyunlarında çıxış etmişəm. Lakin rəsmi oyunlarda debüt eləməyim üçün öz üzərimdə çox çalışmalıyam. Digər tərəfdən tez-tez U-19 milli komandasının heyətinə cəlb olunuram və demək olar ki, “Qarabağ”la toplanışlarda sona qədər ola bilmirəm. Ancaq özümü sübüt edib “Qarabağ”da rəsmi oyuna da çıxacağam.
Bir neçə gündən sonra yenidən U-19-un sıralarına qoşulacaqsan. Milli komandada oyunun necə alınır?
Yığma komandada ilk gündən məşqçilər korpusu mənə güvənməyə başladılar. Millidə olmağımın mənə çox xeyiri var. Çünki yığma komandanın heyətindən dünyanın müxtəlif yığma və klublarına qarşı oynamaq imkanı əldə edirəm.
Gənc futbolçularımızın əksəriyyəti “ulduz xəstəliyi”nə tutulurlar. Bu barədə heç düşünmüsən?
Atam mənə həmişə deyir ki, zamanla çox pul qazanacaqsan, əldə etdiklərini düzgün istifadə etməlisən və hər zaman hədəfin Avropa klublarında çıxış etmək olmalıdır. Atam mənə elə tərbiyyə verməyib ki, pul məni yoldan çıxartsın.
