“Simurq”un sabiq baş məşqçisi Sergey Yuran İngiltərənin “Arsenal” klubunun yarımmüdafiəçisi Andrey Arşavinin karyerasını Azərbaycanda davam etdirmək ehtimalını şərh edib.
– Azərbaycan Premyer Liqası kifayət qədər maraqlı çempionatdı. Beş-altı klub var ki, maliyyə imkanları yaxşıdı və daim çempionluq uğrunda mübarizə aparırlar. Məsələn, “Neftçi”, “Bakı”, “Xəzər Lənkəran”, “Qarabağ”, “İnter”, “Qəbələ” daim iddialı olub. Azərbaycan çempionatının səviyyəsi şəxsən məni yaxşı mənada təəccübləndirmişdi. Məmnuniyyətlə yenidən orda çalışmaq istərdim.
– Əgər Arşavin də sizə zəng edib, məsləhət almaq istəsə, “get” deyərsiz?
– Hər halda dəqiq fikrindən daşındırmaram. Onsuz da Arşavini bundan sonra Rusiyada əl üstündə gəzdirən deyillər. Amma orda az qala bütün ölkə “Arşavin gəl” deyir. Əminəm ki, o, indi sevgiyə, hörmətə çox ehtiyac duyur. Bunu isə sərgilədiyin futbolla qazanmalısan. Daha model kimi getməklə yox. Azərbaycan çempionatı da asan birinciliklərdən deyil ki, bir ayaqla oynamağına imkan versinlər.
– Lənkəran, şəhərdəki baza yadınızda necə qalıb?
– Mənə elə gəlir ki, Lənkəran İranın yaxınlığında yerləşir. Klub əsl futbol stadionuna malikdi. Azarkeşlər bu komandanı dəlicəsinə sevirlər. Çox yaxşı azarkeşlik edirlər. Arşavin qərar qəbul edəndə başa düşməlidi ki, Lənkəran meqapolis deyil. Amma yerli mətbəx çox dadlıdı.
– Bəs meydançaların vəziyyəti necədi?
– Beş ballıq cədvəllə dörd verərdim. Burda süni meydançaların olduğunu eşidəndə çox təəccüblənmişdim. Hətta Bakıdakı stadionlarda da süni örtüyə rast gəlmək olur. Deyirlər ki, dəniz yaxındı, duz qazonu sıradan çıxarır. Qazonları az qala hər il dəyişirlər.
– Maaşları vaxtında ödəyirlər?
– Maliyyə problemi ilə tez-tez üzləşdiyim Qazaxıstandan fərqli, Azərbaycanda belə hallar demək olar ki, yoxdu. Hər şey çox dəqiqliklə həyata keçirilir.
