“Araz Naxçıvan” 5 futbolçu ilə vidalaşdı
Korner.az-ın məlumatına görə, Topaz Premyer Liqasının debütantı “Araz Naxçıvan”ı 5 futbolçu tərk edib. Bu haqda komandanın baş məşqçisi Əsgər Abdullayev deyib.
O, “Neftçi”yə məxsus olan Emil Balayev, AZAL-ın oyunçuları Fərman Qənbərov, Elgün Abbaslı və Elmin Əhmədovun komandalarına geri döndüyünü bildirib. Naxçıvan təmsilçisi millinin ABŞ və U-21-in Norveçlə görüşlərinə çağırılmış qapıçı Balayevi heyətdə saxlamaq istəsə də, son söz “Neftçi”yə məxsusdur.
Bundan başqa, müdafiəçi Şamo Talıbovla da yeni müqavilənin bağlanmaması qərara alınıb. “Turan”ın sabiq oyunçuları Aleksandr Krustkeviç, Ruslan Zubkov və David Canalidze ilə də müqavilə artırılmasa da, onların geriyə qaytarılma variantları da mövcuddur.
Yeri gəlmişkən, “Araz Naxçıvan”ın hazırlıq planlarına da aydınlıq gəlib. Komanda iyunun 15-dən Naxçıvanda hazırlıqlara başlayacaq. İyulun 10-dan isə Türkiyədə hazırlıq keçmək planı var. Burda 4-5 yoxlama oyunu keçiriləcək.
