Azərbaycanlı sabiq FİFA referisi Anar Salmanov "Avro-2016"-nın qrup mərhələsi çərçivəsində dünən başa çatan Azərbaycan-Malta (2:0) oyununun hakimlər briqadasının işinə qiymət verdi.
Salmanov Korner.az saytına açıqlamasında Halis Özkahya və köməkçilərinin idarəçiliyi haqqında fikirlərini bölüşüb: " Ümumiyətlə,ordakı hakimlərin hər birini mən çox yaxşı tanıyıram, hamısına da böyük hörmətim var. Oyunu çox yüksək səviyyədə idarə etdilər. Tamamilə qaydalar çərçivəsində. Nə Azərbaycan, nə də Malta tərəfindən narazılığa rəvac verəcək heç bir qərar qəbul etmədilər. Nə gördülər, fit çaldılar. Demək olar ki, ədalətsiz heç nə baş vermədi. Azərbaycanı da təbrik eləmək olar. Yaxşı oynayaraq, qələbə qazandılar. Hakimlər haqda isə ancaq xoş sözlər demək olar. Açığı deyim, 90 dəqiqə ərzində mən onlarda heç bir mənfi cəhət görə bilmədim. Onu da sizin diqqətinizə çatdırım ki, bu oyunun hakim-inspektoru (İtalyan Covanni Boloqninonu nəzərdə tutur. red.) vaxtilə mənim də hakim-inspektorum olub. Lixtenşteyndə "Vaduts"- "Rux" oyununda. O da ki, çox ədalətli biridir. Mənim şəxsi fikrimcə Halis Özkahyanın idarəçiliyinə hardasa 8.5 qiyməti vermək olar"
Məşhur referi milli komandamızın çıxışına da toxunmağı unutmayıb: " Milli komanda dünən mənə çox gözəl təəssürat bağışladı. Prosineçkinin də ilk ciddi sınağıdır. Özünüz də gördüz ki, Berti Foqtsdan fərqli bir heyət və taktika irəli sürmüşdü. Bu da onun nəticəsi idi ki, Prosineçki Azərbaycanda olduğu 5 ay ərzində bir çox çempionat oyununu izləyib və hər klubun nümayəndələri ilə görüşüb. Milli komandanın heyətində bir çox klublarda top qovan futbolçular yer almışdı. Heyət çox yaxşı və rəngarəng idi. Çətindir, özü də nəzərə alın ki, birinci oyunu idi. Heyəti, taktikanı birdən-birə dəyişmək heç də asan deyil. Yenə də özünü doğrultdu və qələbə qazanmağı bacardı. "Neftçi"dən heç bir futbolçu çağırılmamasına gəlincə isə məncə, o məşqçinin öz işidir. Amma nə qədər də olsa, şəxsi fikrimcə, Araz Abdullayevlə Nurlan Novruzov oynamağa qadir futbolçular idi. İstənilən halda bütün bunlar baş məşqçinin şəxsi işidir, biz ona qarışa bilmərik. Bizə Azərbaycan ictimaiyyətinə,xalqına qələbə lazım idi və o qələbə də qazanıldı. Bu baxımdan mən bütün futbol ictimaiyyətini təbrik edirəm. Biz çalışmalıyıq ki, bu gün futbolumuz inkişaf etsin. Çalışmamalıyıq ki, istər hakiminə, istərsə də. futbolçusuna kimsə badalaq vursun".
