Bir çox azərbaycanlı var ki,onlar başqa ölkələrdə futbolla məşğuldurlar. Media əhli bu oyunçuları üzə çıxartsa da, AFFA-da bu işlə məşğul olan şəxslər nədənsə belə futbolçularla maraqlanmırlar. Bu dəfə sizə hal-hazırda klubsuz olan və bugünədək Almaniyada futbol həyatı sürən azərbaycanlı futbolçu Fərrux Kərimovu təqdim edəciyik. Kərimov Korner.az saytına müsahibə verib.
– Əvvəlcə özünü təqdim et.
Fərrux Kərimov 1987-ci il may ayının 8-də Şamaxı rayonunda anadan olmuşam. Ailədə 4 nəfərik. Ailədə futbolla məşğul olan mənəm.
– Necə oldu ki,futbola gəldin?
Ailəmlə 10 yaşımda Almaniyaya köçdük. Futbola elə burda başladım. Məhəllədə futbol oynayarkən bir alman məşqçi baxdı və bəyəndi. Məni öz klubuna dəvət etdi.
– İlk olaraq hansı klubda futbola başlamısan?
Berlinin "Berliner" SC klubunda. 2000-ci ildə – 13 yaşımda Almaniyanın məşhur klubu "Herta"ya keçmişəm.
– Ampluan nədi?
Dayaq yarımmüdafiəçiyəm.
– Bəs sənin "Herta"da qalmamağına nə səbəb oldu?
20 yaşımda ayağımdan ciddi bir zədə aldım. Bu səbəbdən "Herta" klubunda qala bilmədim. Hətta zədəmə görə 1 il, ümumiyyətlə, futbol oynamadım. Sonra Berlinin "Tasmaniya" klubuna keçdim. Berlində güclü klublardan biridir. Burada yaxşı oynadığım üçün məni "Tennis Borussiya" klubuna göndərdilər.
– Hazırda "Tennis Borussiya"dasan?
Xeyr, bu klubdan çoxdan ayrılmışam.
– Azərbaycandan səninlə maraqlanan varmı?
Azərbaycandan mənə bu günə qədər təklif olmayıb. Türkiyədən təkliflər var idi. Amma Almaniya klublarından təklif daha çox idi.
-Azərbaycandan təklif olsa gələrsən?
Bəli, gəlib oynaya bilərəm.
– Bu günə qədər AFFA-dan səninlə maraqlanan olub?
Mən burada çıxış edərkən yığma komandamız "Union Berlin" klubu ilə yoldaşlıq oyunu keçirdi. Berti Foqts söhbət etmək üçün məni də çağırmışdı.Onunla danışdıqdan sonra dedilər ki, sənə xəbər verəcəyik. Amma o vaxtdan bəri heç kiməlaqə saxlamayıb.
– Səncə, nəyə görə Berti Foqts səni milliyə dəvət eləmədi?
Mən belə düşünürəm ki, sonra mənə ehtiyacları olmayıb. 18 yaşım olanda məni U 19-a dəvət etmişdilər. Amma getmədim.
– Nə səbəbə görə milli komandaya gəlmədin?
Valideynlərim icazə vermədi. Sadəcə buna görə gəlmədim.
– Azərbaycan klubları Almaniyanın hansı liqasında oynaya bilərlər, səncə?
"Qarabağ", "İnter" və "Neftçi". Onlar da 2-ci Bundesliqada çıxış edə bilərlər.
Adil Mirzəzadə
