Ağabala Ramazanov: “Buraxdığımız qola üzüldüm”
01.11.2019 , 14:22
“Səbail”in hücumçusu Ağabala Ramazanov korner.az saytına müsahibə verib.
– Çempionatda IX tur geridə qaldı. Turun oyunlarını necə dəyərləndirirsən?
– Çempionatda maraqlı və gərgin mübarizə davam edir. Əlbəttə ki, hər bir komanda yaxşı nəticə əldə etmək istəyir. Biz də komanda olaraq əlimizdən gələni etməyə çalışırıq.
– Ötən tur “Qarabağ”la qarşılaşdız. Həmin görüşdə 1:0 hesabı ilə məğlub olduz. Başabaş mübarizə olduğunu demək olar?
– Yaxşı oyun sərgilədiyimizi düşünürəm. Sona qədər mübarizə apardıq. Sonda isə buraxdığımız qola çox üzüldüm.
– “Səbail” 10 xalla 4-cü yerdə qərarlaşıb. Necə düşünürsən II dövrənin sonunda komanda ilk “3-lük”də ola bilər?
– Vəziyyətimiz o qədər də pis deyil. Rəqiblərimizlə aramızdakı xal fərqi azdı. Buna görə də hər oyunda yaxşı nəticə göstərməliyik ki, yerimizi qoruyaq.
– X turda “Keşlə” ilə qarşılaşacaqsız. Bu oyunla bağlı nə düşünürsən?
– Qələbə düşünürük. Bu oyunda bizə maksimum nəticə lazımdı. Yalnız qələbə haqda fikirləşdiyimi deyərdim.
– Ramazanov üçün IX tur ərzində yadda qalan matç hansı oldu?
– “Qarabağ”la oyunumuz yadda qalan görüşlərdən biri olduğunu qeyd edərdim.
Mina Musayeva
