Emeri “Qarabağ”dan danışdı: “Qrupdaki hər komandaya hörmət edirik”
31.08.2018 , 17:49
“Avropa Liqası ərəfəsində həftə ərzində iki oyun keçirəcəyik və fiziki cəhətdən hazır olmaq vacibdir. Bu tempə öyrəşməliyik. Avropa Liqasında əlimizdə olan hər bir futbolçudan istifadə etməyə çalışacağıq”. Bu sözləri “Arsenal”ın baş məşqçisi Unay Emeri deyib.
Təcrübəli mütəxəssis Avropa Liqasının qrup mərhələsindəki rəqibləri haqqında danışıb. Eemeri bütün rəqiblərə hörmətlə yanaşdıqlarını dilə gətirib: “Uzun fasilədən sonra beynəlxalq arenaya qayıdırıq. Burada uzun yol qət etmək niyyətindəyik. Qrupdakı hər üç komandaya hörmət edirik. Bəli, bir daha qeyd etmək istəyirəm ki, uzun yol qət etmək və Avropa Liqasının qalibi olmaq istəyirik”.
46 yaşlı ispaniyalı mütəxəssis Azərbaycana səfərin uzun, yorucu olacağını sözlərinə əlavə edib: “Uzun səfərlər hər zaman komandaya çətinlik yaradır. Bu baxımdan Azərbaycana səfərin çətin olacağını düşünürəm. Ancaq bunun öhdəsindən gəlməliyik”.
Qeyd edək ki, London təmsilçisi E qrupunda Sportinq” (Portuqaliya), “Qarabağ” (Azərbaycan) və “Vorskla” (Ukrayna) ilə mübarizə aparacaq.