Azərbaycan Premyer Liqasının XXIV turunda “Sumqayıt” öz meydanında “Neftçi”ni məğlub edib – 2:0.
Korner.az-ın məlumatına görə, oyundan sonra baş tutan mətbuat konfransında meydan sahiblərinin baş məşqçisi Samir Abasov fikirlərini bildirib.
– Birinci dəfədir ki, bu mövsüm ərzində nə deyəcəyimi bilmirəm. Uşaqlarda yaxşı motivasiya var idi. İnanırsınız, necə oynayacağımızı bilmirdik. Bu gün iki hücumçu ilə oynadıq, qələbə qazanmalı idik. Say düzəlsin deyə, Xəyal Nəcəfovun adını oyunun iştirak ərizəsinə daxil etmişdik. Rəşad zədəli idi, Çernişev də ötən gün zədələnmişdi. Qələbə üçün ac idik, şükürlər olsun ki, bacardıq.
– Bu qələbədən sonra 4-cü yer uğrundə mübarizə üçün şansınız qaldı. Necə düşünürsünüz, sona qədər mübarizə apara biləcəksiniz?
– Bütün oyunlar çətindi. Məncə, AZAL və “Zirə” ilə oyundan sonra avrokubok zonasına mübarizə uğrunda taleyimiz bəlli olacaq. Sona qədər döyüşəcəyik.
– Amil Yunanov möhtəşəm və baxımlı qol vurdu. Onun vurduğu qol haqda nə deyə bilərsiniz?
– Bu qol bizim üçün xüsusi motivasiya olacaq. Bu, futbolçulara və Amilə əlavə güc verəcək. (sportal.az)
