“Xəzər Lənkəran”ın kapitanı kapitanı Rahid Əmirquliyevijn müsahibəsi.
– Artıq “Qarabağ”la müqavilə imzalamısınız?
– Mən də mətbuatdan oxuyuram. Hələ heç nə rəsmiləşməyib.
– Amma razılıq əldə olunub…
– Razılaşmaqla rəsmi müqavilə imzalamaq ayrı-ayrı şeylərdi. Biz rəsmi müqavilə imzalamamışıq.
– Deməli, yeni ünvanınız “Qarabağ”dır?
– Ola bilər. Çünki başqa variantlar da var. Sabah bütün suallar cavabını tapacaq.
– “Qarabağ”da sizin çıxış edəcəyiniz mövqedə 4 futbolçu var. Belə olan halda “Qarabağ”a keçməyin vacib idi, yoxsa daha rahat şəkildə forma geyinə biləcəyin və keçidinə ehtiyacı olan “Qəbələ”yə?
– “Qarabağ”da yaxşı futbolçular yer alıb. Orda əsas heyətə düşmək üçün güclü rəqabət var. Bu da futbolçunun xeyrinə işləyən amildi. Əgər “Qarabağ” variantı alınsa, çalışacam özümü sübut edim və əsas heyətə düşə bilim.
– Anlaşmanın müddəti iki il yarım olacaq?
– Sabah bilinəcək. Çünki dekabrın 30-na qədər “Xəzər Lənkəran”ın futbolçusu hesab edilirəm. Müqavilə imzalanan zaman dəqiqləşəcək.
– Bir ara Xorvatiya klubları da sizinlə maraqlanırdı. Xaricə getmək istəməməyiniz nədən irəli gəlir?
– Təklif almışdım. Amma heç bir klubla danışıq aparmadım. Yerli klublarımıza üstünlük verdim. Xaricə çıxmamağım ailə məsələləri ilə bağlıdı. Çünki bəzi problemlərim var.
– Gəmini sonuncu tərk edən kapitan olur. Bu gün kapitanın ayrılmaq haqda qərar verməyi gəminin batmasına işarədi?
– Mənə də ağır gəlir. “Xəzər Lənkəran” heç vaxt bu vəziyyətdə olmamışdı. Komandanı belə vəziyyətdə buraxıb getmək istəmirdim, ancaq belə alındı.
– Qış fasiləsi zamanı transferlərin olacağı bildirilirdi. Sizin gedişiniz bu deyilənlərin boş vəd olduğu anlamına gəlmir?
– Bu suala rəhbərlik cavab versə, daha yaxşı olar. Amma Lənkəran azarkeşləri bu cür vəziyyətə layiq deyil. Komanda yarandığı gündən çempionluq uğrunda yarışıb. Bu cür çıxış etməkdənsə, oynamamaq daha yaxşı olardı.
– Amma azarkeşlərin sizə münasibəti dəyişməyib..
– Çalışmışam ki, geyindiyim formanın haqqını verim. Azarkeşlərimizə təşəkkür edirəm. Yaxşı günümüzdə olduğu kimi, çətin anlarımızda da bizi yalqız buraxmadılar. Nəsə demək çətindi…
– İlin ən yaxşı futbolçusu seçilsəniz də, mükafatınızı almağa gəlmədiniz…
– Səs verənlərə təşəkkür edirəm. Çalışacam, daim yüksək formada olum. Tədbirə gəlməməyim vaxt problemi ilə bağlı idi. Mənə 2 gün qalmış məlumat verdilər. İşlərimi yekunlaşdıra bilmədiyimdən, qatıla bilmədim. Üzürlü hesab edin.
apasport.az
