Bu gün AFFA “Bakcell”lə əməkdaşlıq çərçivəsində yeni layihəyə start verib.
Korner.az-ın məlumatına görə, sözügedən layihənin açılış mərasimində iştirak edən Rövnəq Abdullayev jurnalistlərə ölkə futbolu ilə bağlı açıqlamalar verib. Qurum başçısı “altılıq” sisteminin mənfi cəhətindən danışıb:
“Altılıq” sisteminin müsbət cəhətləri olduğu kimi, bəzi mənfi cəhətləri də var. Görürük ki, AZAL və “Xəzər Lənkəran” kimi güclü komandalar ilk “altılıq”dan kənarda qalıb. Bu da həmin klubların motivasiyasının azalmasına səbəb olur və bu səbəbdən çempionata maraq azalır”.
R.Abdullayev daha sonra çempionluq yarışının tək “Qarabağ” və “Neftçi” arasında getməyəcəyini bildirib:
“Çempionluğun 2 komanda arasında gedəcəyi haqda danışmaq hələ tezdir. Məncə, hələ çempionatın sonunu gözləmək lazımdır”.
AFFA prezidenti daha sonra azarkeşlərin oyunları stadionlardan izləməməsi ilə bağlı bunları deyib:
"Əvvəl azarkeşlərimiz deyərdi ki, stadionlarımız yoxdu. İndi stadion var, ancaq oyunlara gələn yoxdur. Məsələn, 12 minlik “Bakcell Arena” var, ancaq heç onu doldurmurlar. Yaxınlarda 68 minlik Olimpiya stadionu istifadəyə veriləcək, bəs bunu necə dolduracaqlar?"
