“Qarabağ” Azərbaycan Premyer Liqası tarixində yeni rekord müəyyənləşdirib.
Korner.az-ın klubun saytına istinadın yaydığı xəbərə görə, Topaz Premyer Liqanın 28-ci turunda səfərdə “Qəbələ”yə 2:0 hesabı ilə qalib gələn Ağdam komandası “altılıq”da qələbə seriyasını beşə çatdırıb.
Final mərhələsinin ilk turunda “Simurq”a səfərdə məğlub olan “Qarabağ” ardınca qələbə seriyasına başlayıb: “Qəbələ” – 1:0, “Neftçi” – 2:1, “İnter” – 3:2, “Bakı” – 1:0, “Qəbələ” – 2:0. Bu, “altılıq” sistemi tətbiq olunduğu çempionatlarda qeydə alınmış yeganə seriyadı. İndiyə kimi final mərhələsindəki ilk “altılıq”lıqda heç bir klub ardıcıl beş qələbə qazana bilməmişdi.
“Qarabağ” bu qələbəylə ikinci sırada bir qədər möhkəmlənərək liderlə üç xallıq fərqin böyüməsinə imkan vermədi. Dördüncü pillədə qərarlaşmış “Simurq”dan isə 14 xal uzaqlaşaraq həm ilk üçlükdə yerini, həm də avrokuboklara vəsiqəni təmin edib.
