FİFA-nın açıqladığı son reytinq siyahısında Foqtsun rəhbərlik etdiyi millimiz 4 pillə gerilədi.
Onsuzda heç bir nəticə verməyən, Lüksemburq səfərində qazanılan bir xalı "qızıl"a bərabər tutan futbolçularımızın Portuqaliya ilə ev oyununda futbol adına heç bir şey göstərməmələri reytinq siyahısında bu acınacaqlı vəziyyətin çox uzaqda olmadığına dəlalət edirdi.
Maraqlısı budur ki, Benin (99-cu yer), Niger (100), Mozambik (106), Tanzaniya (116) eləcə də, çoxlarının tanımadığı Surinam (113), Antiqua və Barbuda (118) kimi ölkələr Foqtslu yığmanı qabaqlayaraq millimizin hansı səviyyədə olmasını bir daha sübut etdi. Bundan əlavə yəqin ki, adı çəkilən ölkələrdə şərait və qazanılan pul, bizim ölkədəkindən azı 4-5 dəfə azdı.
AFFA-nın bu tip faktorlara diqqət yetirməsi gərəkdi. Lakin AFFA-nın qalustukluları nə etdiyinin türklər demişkən farkındalar.
AFFA-nın daha bir diqqət yetirməli olduğu məqam isə millimizin keçmiş SSRİ-nin 15 ölkəsi arasında 11-ci yeri tutmasıdı. Qısacası Rusiya 11-ci, Ukrayna 37-ci, Özbəkistan 66-cı, Belarus 69-cu, Ermənistan 90-cı, Gürcüstan 91-ci, Estoniya 93-cü, Latviya 110-cu, Litva 111-ci, Tacikstan isə 112-cidi.
Əlavə sözə ehtiyac varmı?
Ancaq bir şad xəbərim var sizə… AFFA-nın Foqtslu millisi Türkmənistan (131), Moldova (138), Qırğızıstan (142) və Kazaxıstandan (144) öndədi.
Süzün badələrə…
Səxavət QURBANOV
