Çempionatda ilk altılıq mübarizəsini davam etdirən "Rəvan”da mövsümün qalan hissəsinə hazırlıq davam etməkdədi.
Korner.az-ın məlumatına görə, artıq 3 yoxlama oyunu keçirən komanda fevralın 9-unu səbirsizliklə gözləyir. Axı məhz həmin tarixdə çempionat yenidən "diriləcək”.
Bu arada “Rəvan”ın baş məşqçisi Ramil Əliyev klubun rəsmi saytına müsahibəsində hazırlıqdan danışıb: "Çempionata ciddi hazırlaşırıq. Ağır məşqlərdən sonra 3 yoldaşlıq oyunu keçirdik. Nəticə baxımından o qədər də ürək açan olmadı, çünki son iki oyunumuzda heç-heçə oynadıq. Amma futbolçuların əzmkarlığı, mübarizliyi xoşumuza gəldi. Hazırda yeni futbolçuların uyğunlaşma prosesi gedir. Buna görə də hələ komandaya tam adaptasiya olmamaları tam təbii haldı. Yeni transferlərimiz komandanı gücləndirəcək səviyyədədi. Növbəti turlarda tam fərqli "Rəvan” görəcəyik”.
Zədəli futbolçuların olmamasına sevindiyini deyən çalışdırıcı artıq indidən növbəti mövsüm üçün daha iddialı komanda qurmağın zəruriliyini bildirib. Əliyev komandanın cari mövsüm üçün iddialarından da danışarkən belə deyib:
"Çempionatda hələ ilk altılığa düşmək şanslarımız qalır. Bu üzdən bütün matçlarda qələbəyə oynamalıyıq. Düzdü, taleyimiz öz əlimizdə deyil, ancaq sona qədər mübarizə aparacağıq. Artıq indidən növbəti mövsüm daha iddialı komanda olmaq işinə başlamalıyıq.
Bunun təməlini indidən qoymaq lazımdı. Hazırda bizim üçün prioritet təbii ki, ölkə kubokudu. Bu turnirdə mümkün qədər irəli getməyə çalışacağıq. Rəqib güclü komanda olsa da, heç kimdən qorxmuruq, çəkinmirik”.
“Rəvan” Azərbaycan kubokunun ¼ final mərhələsində "Xəzər Lənkəran”la üz-üzə gələcək. Bu oyunlar 27 fevral və 7 mart tarixlərində baş tutacaq.
