"Dəvət baş məşqçi Mahmud Qurbanovdan gəldi. Mən də razılıq verdim. "Professor"la işləmək qürurvericidir. "Kəpəz"də çalışmaq hamının arzusudur. Yaş önəmli deyil, əsas yaxşı işləməkdir".
Korner.az-ın məlumatına görə, bu sözləri "Kəpəz" klubuna yeni köməkçi-məşqçi təyin olunmuş İbrahim Hüseynov deyib.
Klubun rəsmi saytına danışan İ.Hüseynov komandasının uğuru üçün əlindən gələni edəcəyini bildirib: "Özüm gəncəliyəm və şəhərin hər iki komandasında futbol oynamışam. Məşqçi kimi müəyyən biliklərim də var. Təcrübəmi Mahmud müəllim yanında daha da artıracağam. Ona və doğma komandamıza kömək etmək üçün əlimdən gələni edəcəyəm. Artıq futbolçu karyeramı da bitirdim. Özümü bütövlüklə məşqçi işinə həsr etmişəm. Bəslənən ümidləri doğrultmağa çalışacağam."
