"Bakı"nın futbolçusu Şəhriyar Əliyevin Korner.az saytına müsahibəsi
– "Turan"la oyununuz məlum səbəbdən təxirə salındı. Bu komandaya qarşıdakı oyunda nə kimi kömək edə bilər?
"Turan"la oyunun baş tutmaması bizim istirahət etməmizə səbəb oldu. Məncə bu bizim xeyrimizə ola bilər. Çünki 4 gündən bir oyun keçirirdik. Oyunun təxirə salınması xeyrimizə ola bilər. Qarşıdan "Qarabağ"la vacib oyun gəlir. Bu bizə kömək edə bilər.
– Premyer Liqanın hal-hazırkı lideri ilə qarşılaşacaqsınız. "Qarabağ"ı təhlil edə bilmisizmi?
Təbii ki, onların bəzi zəif mövqeylərini bilirik. Lakin "Qarabağ" güclü komandadı. Onlarla oyunda 3 xalı hədəfləmişik.
– "Qarabağ"dan 10 xal geri qalırsız. Lakin ehtiyatda oyunlarınız var. Bu və ilk "altılıq" şanslarınızı necə dəyərləndirirsiz?
Bizim ehtiyatda "Neftçi", "Turan"la oyunlarımız var. Bundan əlavə bu il "Qarabağ" və "İnter"lə oyunlarda maksimum xal toplaya bilsək ilk "altılıq"ı özümüz üçün təmin edə bilərik. Turnir cədvəlində vəziyyət elədir ki, komandalar bir-birinə xal fərqi ilə yaxındı. Hər şey ola bilər.
– Bir müdafiəçi kimi Premyer Liqanın ən çox qol vuran ikinci komandasında hansı futbolçulardan çəkinirsən?
"Qarabağ"ın heyətində yaxşı futbolçular çoxdu. Rauf Əliyev, Vüqar Nadirov, Əfran İsmayılov və s. Biz bu oyunda müdafiəni sıfır xaxlamağa, qol buraxmamağa çalışacağıq. İlk növbədə müdafiəyə fikir verəcəyik. Çünki müdafiəni sıfır saxlaya bilsək, qələbə qazanmaq çətin olmayacaq.
– Premyer Liqanın ən çox heç-heçə edən komandasısız. Güclü komandalarla qarşılaşmalarda heç-heçə "Bakı"nın sevimli nəticəsidir demək olarmı?
Deməzdim ki, biz heç-heçə üçün meydana çıxırıq. Sadəcə sonda nəticə belə olur. Biz müdafiəyə daha çox fikir veririk. Çünki qol buraxmamaq əsas məsələdi. Ondan sonra qol vurmaq olar.
Səxavət QURBANOV
