Ramil Şeydayev: “Kürdəmirdə peşəkar klub yaradılsa, maliyyə dəstəyi verə bilərəm”
09.03.2020 , 17:14
Əslən Kürdəmirdən olan Azərbaycan millisinin və “Sabah” klubunun futbolçusu Ramil Şeydayev bu gün həmyerliləri ilə görüşüb. O, bununla bağlı müsahibə verib…
– Kürdəmir futboluna hansı töhfəni verə bilərsiz?
– Kömək etməyə çalışıram. Amma burada ən önəmli amil maliyyədi. İlk növbədə, sponsor olmalıdı. Açığı, indiki məqamda mən bunu edə bilmərəm. Çünki özüm hələ futbolçuyam. Lakin gələcəkdə Kürdəmir futboluna kömək etmək planlarımda var. Rayon komandasının Premyer Liqada oynaması üçün dəstək verməyi düşünürəm.
– Hazırda sizin mənəvi dəstəyiniz daha önəmlidi. Bu gün rayonda istedadlı futbolçuların üzə çıxmaları və yetişmələri üçün onlara nə məsləhət görərdiz?
– Bunu yalnız sözlər vasitəsilə ifadə edə bilərəm. Bura yenə gələcəyəm. Bilmirəm, bunun nə dərəcədə köməyi dəyəcək. Bəlkə də bura gəlişim uşaqlar, futbolçular üçün əlavə motivasiya olar. Yavaş-yavaş nələrsə etməyə çalışıram.
– Kürdəmirdə gənclərdən ibarət komanda yaradılsa, onlarla mütəmadi maraqlana bilərsiz?
– Əlbəttə, Premyer Liqada iştirak etmək üçün komanda yaradılsa, həm maliyyə məsələsində, həm də digər işlərdə kömək edə bilərəm. Hamımız birlikdə nələrsə etməyə çalışacağıq. Düşünürəm ki, indi olmasa da, gələcəkdə bunu edə bilərik.
– Futbol komandasını yaratmaq üçün ilk olaraq nədən başlamaq lazımdır?
– Bayaq da dediyim kimi, əsas məsələ maliyyədir.
– Kürdəmirli gənc futbolçulara nəyi tövsiyə edərdiz?
– Region Liqasında yaxşı oynamalarını, özlərini göstərmələrini məsləhət görərdim. Komandaya bu turnirdə uğurlar arzu edirəm.
– Kürdəmirlə bağlı hansı xatirələriniz var? Bir dəfə sosial şəbəkə hesabınızda “Bığ” restoranının qarşısında çəkdirdiyiniz fotonuzu paylaşmışdınız.
– Rayona əvvəllər də gəlmişəm. Cəyli kəndində nənə-babamın yanında olmuşam. “Bığ” restoranında isə çay içmişəm. Başqa heç nə xatırlamıram. (Report)
