"Bunlar hansısa çirkin insanların mənim işimə xələl gətirmək üçün düşündüyü ssenaridir"
"Simurq"un əvəzedici heyətinin baş məşqçisi Rövşən Babayev idman portallarından birində "Xodukinin "İnter"dəki hoqqaları" başlıqlı yazıda onun barəsində qeyd olunan iddialara rəsmi şəkildə açıqlama gətirib.
Korner.az-ın məlumatına görə, klubun rəsmi saytına danışan gənc mütəxəssis bunları deyib:
"Mən iyul ayından "Simurq"un əvəzedici heyətinin baş məqşçisi və uşaq futbol məktəbinin rəhbəri kimi karyeramı davam etdirirəm. Haqqımda bu fikri kim yazıbsa, ondan yazdıqlarını əsaslandırmasını istəyirəm. Bu gün mənim "İnter"lə heç bir əlaqəm yoxdur. O klubda işlədiyim dövrdə çalışmışam ki, doğurdanda komandaya xeyrdən başqa heç nə verməyim.
Bu gün mənim "İnter"dəki fəaliyyətimi dəyərləndirmirlərsə, haqqımda bu cür yazılar yazırlarsa, onlardan bu məsələni şəxsən mənimlə aydınlaşdırmasını tələb edirəm. Yenə qeyd etmək istəyirəm ki, mənim keçmiş iş yerimlə heç bir əlaqəm yoxdur, bu barədə heç düşünmək və danışmaq belə istəmirəm.
Bütün bunlar hansısa çirkin insanların mənim işimə xələl gətirmək üçün düşündüyü ssenaridir. Mənim fəaliyyətim göz qabağındadır".
