1223 gündən sonra

Premyer Liqanın II turunda “Kəpəz”i 4:0 hesabı ilə məğlub edən “Xəzər Lənkəran” ölkə çempionatlarında ev oyunlarında ardıcıl 2-ci böyük hesablı qələbəsini qazanıb. Korner.az– ın klubun rəsmi saytına istinadən məlumatına görə, ötən mövsümə Lənkəranda “Qarabağ” üzərində 4:1 hesablı qələbə ilə yekun vuran Yunis Hüseynovun yetirmələri yenə 4 qol vurmaqla bunu bacarıb.

Bu, “Xəzər Lənkəran”ın tarixində 49-cu belə qələbəsidir. Ölkə çempionatında 37-ci fərqli qələbəyə sevinən cənublular kubokda 11, “Birlik kuboku”nda 1 dəfə böyük hesabla qalib gəlib. Hüseynovun rəhbərliyi altında 2-ci böyük hesablı qələbə ilə eyni zamanda onun fəaliyyəti dövründə ən böyük fərq qeydə alınıb.

Ümumilikdə isə tarixində 22-ci dəfə 4 və daha çox fərqlə qalib gələn “Xəzər Lənkəran” 1223 gündür belə nəticə göstərmirdi. Buna sonuncu dəfə 2009-cu il aprelin 5-də təsadüf olunub. Həmin vaxt “Standard” Lənkərandan 0:4 hesablı məğlubiyyətlə ayrılıb. 2008/09 mövsümündəki həmin qələbədən sonra 3 top fərqinə dəfələrlə nail olunsa da, belə darmadağın qeydə alınmırdı.