Əfran İsmayılov: “Milli mənim üçün bu saat o qədər də maraqlı deyil”
24.09.2018 , 10:09
“İlk hissədə yaxşı oynayırdıq. Xeyli qol şanslarımız olsa da, bundan istifadə edə bilmədik. Rəqib isə bir səhvdən sonra hesabı açdı. Fasilədə futbolçularla danışdıq, dedik ki, buraxmışıqsa, mütləq əvəzini çıxmalı, biz də qol vurmalıyıq. Çünki qələbə qazanmaq çox vacib idi. Bundan əvvəlki oyunlarda öz futbolumuza görə məğlub olmamışıdıq. Çox nüanslar vardı. Bu oyunda qələbə qazandıq. Bizi daha çətin oyunlar gözləyir. Bu günü unutmaq lazımdır”. Bu sözləri “Sumqayıt”ın futbolçusu Əfran İsmayılov Topaz Premyer Liqasının V turunda “Keşlə”yə qalib gəldikləri görüşü dəyərləndirərkən deyib.
Yarımmüdafiəçi fasilədən sonra baş məşqçi Nazim Süleymçanovun tapşırıqlarına əməl etdikləri və göstərdikləri oyuna görə qələbə qollarını vurmağı bacardıqlarını söyləyib: “Baş məşqçimiz Nazim Süleymanov fasilədən sonra bizi ruhlandırdı, yaxşı oynadığımızı dedi. Həm də oynadığımız futbol göz qabağında idi. Bir neçə qol epziodu yaratdıq, vura bilmədik. Hakimlər haqda danışmaq istəmirəm, ancaq penalti epizoduna baxmaq lazımrdı. Məncə, orda penalti var idi, vermədi. Futbolda belə şeylər olur. Əsas odur ki, hakimi, hər şeyi kənara qoyub, vəziyyəti dəyişməyin vacibliyini düşündük”.
Əfran əvvəlki formasını bərpa etməyə çalışdığını, buna görə “Sumqayıt”a üz tutduğunu dilə gətirib: “Əvvəlki formamı bərpa etməyə çalışıram. “Sumqayıt”a gəlməkdə məqsədim budur. Rəhbərlik, məşqçi heyəti və futbolçular çox sağ olsunlar ki, mənə böyük dəstək oldular. Arzuladığım hüzuru “Sumqayıt”da tapmışam”.
Təcrübəli futbolçu hazırda milli komanda barədə düşünmədiyini deyib: “Hazırda milli yox, “Sumqayıt” barədə düşünürəm. Milli mənim üçün bu saat o qədər də maraqlı deyil. Çağırarlar-çağırarlar, çağırmayacaqlar-çağırmayacaqlar”
