Noyabrın 4-16-sı aralığında Qazaxıstanın Almatı şəhərində 81-ci kişilər və 24-cü qadınlar arasında ağır atletika üzrə dünya çempionatı keçiriləcək.
Korner.az-ın məlumatına görə, nüfuzlu turnirdə milli komandamızın idmançıları da iştirak edəcəklər.
Azərbaycan 4 qadın və 9 kişi atlet təmsil edəcək. Həmin idmançılar bunlardır:
Qadınlar: Boyanka Kostova və Əlizadə Gülçin (Zirvə) – hər ikisi 53 kq çəki dərəcəsi, Abbasova Elnarə (Zirvə) – 63 kq, Anastasiya İbrahimli (Zirvə) – 69 kq.
Kişilər: Alıyev Elmar – 56 kq, İmanzadə Rüstəm (Zirvə) və Rauf Nəbiyev – hər ikisi 62 kq çəki dərəcəsi, Əfqan Bayramov – 69 kq, İvan Stoitsov – 77 kq, Orxan Əliquluzadə (Zirvə) və Rövşən Fətullayev (Zirvə) – hər ikisi 94 kq, Dadaş Dadaşbəyli (Zirvə) – 105 kq, Məmmədli Azər (Zirvə) – +105 kq.
Qeyd etmək lazımdır ki, milli komandamızın 13 üzvündən 8-i “Zirvə” İdman Klubunun üzvləridir. Onların içərisində gənc və böyük perspektiv vəd edən atletlərimizdə var.
Qızlardan Avropa çempionatının bürünc medalçısı Əlizadə Gülçin və Azərbaycan çempionu Elnarə Abbasova lisenziya xalları qazanmaq üçün körpücük üzərinə çıxacaqlar. “Qazax-Zirvə” İdman Klubunun nümayəndələri olan qızlarımız üçün bu, böyüklər arasında ilk dünya çempionatı olacaq.
“Lənkəran-Zirvə” idmançılarından Orxan Əliquluzadə və yeniyetmələr arasında Avropa çemponu Rüstəm İmanzadə, gənclər arasında dünya çempionatının gümüş medalçısı Azər Məmmədli, “Qobustan-Zirvə” atleti Dadaş Dadaşbəyli də karyeralarında ilk dəfə böyüklərin dünya çempionatında mübarizə aparacaqlar.
