Azərbaycanda dövlət tərəfindən idmana göstərilən böyük diqqət və qayğının nəticəsində ölkəmiz dünyada ön sıralarda yer alaraq öz mövqeyini qorumaqdadır. Bu siyasətə öz dəstək məqsədilə avqustun 29-30-da Astara Olimpiya İdman kompleksində “Zirvə” Beynəlxalq İdman Klubunun (BİK) filialları arasında “9-cu Dünya Kuboku” keçiriləcəkdir. Yarışda Azərbaycan da daxil olmaqla, klubumuzun 12 ölkədən – Türkiyə, Rusiya, İran, Gürcüstan, İsrail, Bolqarıstan, Moldova, Belarus, Ukrayna, Polşa, ABŞ – olan yüzə yaxın atletinin iştirak edəcəyi gözlənilir.
Astara Şəhər İcra Hakimiyyətinin təşkilatı dəstəyi ilə baş tutan turnir kişilər və qadınlar arasında müvafiq yaş qrupları üzrə keçiriləcəkdir. Hər yaş qrupunda qalib və mükafatçılar Sinkleyr cədvəli üzrə müəyyənləşdiriləcəkdir. Öz qrupunda fəxri kürsüyə qalxan idmançılar və onların məşqçilərinə müvafiq pul mükafatları, diplom, xüsusilə bu yarış üçün hazırlanmış medal və kuboklar, müxtəlif hədiyyələr və mənzil sertifikatları təqdim olunacaqdır. Qeyd edək ki, bir neçə il ərzində mənzil sertifikatlarını toplayan atletlər, Xırdalan və Astaradakı AAAF Park Yaşayış Kompleksində müvafiq qiymətdə olan evi təmənnasız əldə edə biləcəklər.
Kişilər 4 yaş qrupunda yarışacaqlar. Bunlar aşağıdakılardır:
– U-14 (yaşı 14-ə qədər olan idmançılar)
– U-18 (yaşı 18-ə qədər olan idmançılar)
– +18 (yaşı 18-dən yuxarı olan idmançılar)
– Veteranlar (yaşı 35-dən yuxarı olan idmançılar)
Qadınlar 3 yaş qrupunda mübarizə aparacaqlar. Bunlar aşağıdakılardır:
– U-14 (yaşı 14-ə qədər olan idmançılar)
– U-18 (yaşı 18-ə qədər olan idmançılar)
– +18 (yaşı 18-dən yuxarı olan idmançılar)
Yarışda idmançılar həm fərdi, həm də klublarının qələbəsi üçün mübarizə aparacaqlar. Sonda turnirin ən yaxşı qadın idmançısı, ən yaxşı kişi idmançısı, həmçinin ən yaxşı klublar seçilərək mükafatlandırılacaqlar.
DÜNYA SƏVİYYƏLİ KLUB
Dünya Kuboku “Zirvə” BİK-in ənənəvi çempionatıdır. Klubun prezidenti sabiq ağır atlet, 1996-cı il Atlanta Olimpiadasının iştirakçısı, SSRİ İdman Ustası və beynəlxalq dərəcəli hakim Tofiq Heydərovdur. Azərbaycanda bütün regionlarda – 20-dən çox rayonda 700-ə yaxın ağır atletin üzvü olduğu “Zirvə” BİK, ölkəmizin aparıcı klublarındandır. Məhz bu klubun atletləri istər klubdaxili, istər Respublika, istərsə də müxtəlif beynəlxalq yarışlarda böyük uğurlar qazanaraq Azərbaycanı layiqincə təmsil edə bilirlər. Hər il orta hesabla 30-a yaxın medalın məhz bu klubun nümayəndələri tərəfindən qazanılması buna misaldır.
MÖHTƏŞƏM ASTARA AAAF PARK LAYİHƏSİ
AAAF Park Yaşayış Kompleksi çoxfunksiyalı, dövrünü qabaqlayan, ən müasir standartlara cavab verən, modern, təkrarolunmaz bir layihədir.
Sağlam həyat tərzi ilə adi həyatın ideal sintezinin yaradıldığı bu məkan, kiçik bir şəhərdə olan bütün obyektləri özündə ehtiva edir. Artıq Xırdalanla yanaşı, Astarada da bu Park hazır olmaq üzrədir. Astara Şəhər İcra Hakimiyyətinin inşa etdiyi dənizkənarı bulvara bitişik olan bu kompleksdə bütün növ xidmətlər mövcuddur.
Astara şəhəri, Gənclər küçəsindəki 20 hektar ərazidə inşaası nəzərdə tutulan “AAAF Park Astara”da süni şəlalələr, “Limuland” açıq və qapalı uşaq əyləncə mərkəzi, açıq fitnes meydançası, kafe-çay evi, “Zirvə” Uşaq İdman Akademiyası, uşaq-əyləncə attraksionları, “Astara Towers”, 5 ulduzlu “Tuado” oteli, hovuz və SPA mərkəzi, çimərlik kompleksi, ağır atletika, boks və taekvondo mərkəzləri, villalar, 4 və 5 mərtəbəli binalar nəzərdə tutulmuşdur.
Xatırladaq ki, Azərbaycan Respublikasının Prezidenti İlham Əliyev aprelin 11-də Astaraya səfəri zamanı “AAAF Park Astara” layihəsi ilə tanış olmuşdu. Ölkə başçısı layihədən razılığını dilə gətirərək, görülən və görüləcək işlərdən məmnunluğunu bildirib, tapşırıq və tövsiyələrini vermişdi.
